Ресей мен Украина арасындағы қақтығыс салдарынан миллиондап шығынға батқан отандық кейбір кәсіпкерлер, Үкіметтен субсидия сұрайды. Өйткені, қоймадағы тауарды өзге елге жөнелтуге біраз уақыт кетеді деп отыр. Ал Атамекен кәсіпкерлік палатасы қазір Еуропа елдеріне шығудың балама жолдары қарастырылып жатқанын айтады.
Осы уақытқа дейін Украинаға Қазақстанның Арқалығынан тонналап былғары жіберіп келген кәсіпкер айналдырған екі айдың ішінде шығынға белшеден батқанын айтады. Қазір қоймадағы 200 тонна тауарды Өзбекстан мен Польшаға жіберуге жанталасып жатыр екен. Өйткені, бір айдың ішінде шикізатты жөнелтіп үлгермесе, өнімнің сапасы бұзылып, қайта өңдеуге тура келеді дейді.
ЕРЖАН САЛЕКОВ, кәсіпорынның атқарушы директоры:
– Біз өндіретін тауардың 75 пайызын Украина, қалғанын осы еліміздегі кәсіпорындар алатын. Енді геосаяси жағдайдан кейін 3 жүк көлігі жарты жолдан қайтып келді. Үкімет субсидия бермесе, жұмысымыздың жанданып кетуі қиын. Қазір тауарларды басқа елдерге жіберуге келіссөздер жүріп жатыр.
Атамекен кәсіпкерлік палатасы әскери қақтығыс басталған кезде қазақстандық 57 жүк көлігі Украинадан дер кезінде шығарылды, үкіметтің кәсіпкерлерге деген көмегі осы болды дейді. Бірақ, темір жол арқылы келуі тиіс 1 жарым мың қазақстандық вагон әлі тұралап тұр. Темір жол әкімшісімен байланыс әлдеқашан үзілген.
МҰРАТ ӘМРИН, "Атамекен" ҰКП Логистика және тасымалдау департаментінің директоры:
– Бүгінде қазақстандық жүк тасымалдаушы компанияларға Еуропадан тауар әкелуге тыйым салынбаған. Сондықтан қазір балама жолдарды қарастырып жатырмыз. Нақтырақ айтсақ,Транскаспий халықаралық көлік бағдары арқылы. Каспий теңізі арқылы Әзірбайжан, Грузия, Түркия, Болгариядан тауар тасымалдау мәселесін пысықтап жатырмыз.
Яғни, Ақтау порты арқылы Баку, Грузияға дейін жетіп, әрі қарай темір жолмен немесе автокөлікпен тауар тасымалдана бермек. Айта кетейік, екі ел арасындағы тауар айналымы былтыр 1 миллиард доллар болатын. Украиндан бізге ет, дәрі-дәрмек, қағаз, ауыл шаруашылығына қажетті құрылғылар мен кондитерлік өнімдер жіберіліп келген еді. Ал экспортталып келген тас көмір, цинк, минералды және химиялық тыңайтқыштар мен өзге де өнімдердің қалай, қайда жөнелтілетіні әлі белгісіз. Ал шығынға батқан кәсіпкерлерге көмек қажет екенін Үкіметке жеткізген палата әлі мардымды жауап алмадық деп отыр.
Әйгерім Ердәулет, Ринат Әбілқайров, Дидар Елеуов
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#кәсіпкерлік #көмек #Атамекен #субсидия
