ՀՀ կառավարությունը հունիսի 1-ի նիստում հավանություն տվեց «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» օրենքում փոփոխություններին. օրենքով սահմանված կարգի խախտմամբ պարտադիր զինվորական ծառայության զորակոչից նախկին տարիների ընթացքում խուսափած ու 27 տարին լրացած բազմաթիվ ՀՀ քաղաքացիներ, խուսափելով քրեական հետապնդումից, գտնվում են ՀՀ սահմաններից դուրս: Հարուցված քրեական գործերով հետախուզման մեջ գտնվելու պատճառով ներկայում հազարավոր անձինք հնարավորություն չունեն վերադառնալ Հայաստան:

Հարուցված քրեական հետապնդումը դադարեցնելու նպատակով 2005-2015 թվականներին 8 փոփոխություններ են արվել, որոնք, ըստ կառավարության, մեծ խթան են հանդիսացել հազարավոր երիտասարդների վերադարձը Հայրենիք ապահովելու գործում:

Օրենքի գործողության ոլորտը վերջին փոփոխության ժամանակ ընդգրկել է 1992 թվականի աշնանային զորակոչից մինչև 2015 թվականի մայիսի 1-ն ընկած ժամանակահատվածը:

«Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքի գործողության ժամկետի երկարաձգումը կնպաստի հազարից ավելի անձանց հայրենադարձությանը, հնարավորություն կտա նրանց սահմանված ժամկետում մուծել համապատասխան վճարը, ազատվել քրեական հետապնդումից: Սահմանված կարգով վճարները կմուտքագրվեն ՀՀ պաշտպանության նախարարության հատուկ այդ նպատակով բացված հաշվեհամարին, որը էական ազդեցություն կունենա ոլորտում առկա խնդիրների լուծման համար:

свернуть