Во изминатиот период беше комплетиран проектот за креирање на 3Д виртуелен универзитет, чија задача беше изработка на виртуелни 3Д модели на Универзитетот „Гоце Делчев" и неговите придружни членки со помош на современи алатки за 3Д моделирање.
Во рамките на проектот се изработени панорамски модели кои овозможуваат реалистичен приказ на сите наставни центри кои функционираат во состав на УГД.
Носител на проектот е Институтот за информатика на Факултетот за информатика при Универзитетот „Гоце Делчев", под раководство на доц. д-р Сашо Коцески. Свој придонес во тековните работи и активности во склоп на проектот дадоа и студентите од трета година на Факултетот за информатика, како и студентите-постдипломци на Факултетот за природни и технички науки, насока Компјутерски дизајн.
Виртуелниот приказ на УГД може да се види преку посета на веб-страницата на Институтот за информатика.
