Бүгін Ақтөбеде «Unnity corporation» компаниясының салымшылары қалалық соттың алдында наразылық шарасын ұйымдастырды. Олар халықты алдап, пирамида құрғандар жазалануын, елдің миллиондап салған ақшаларын қайтарып беруді талап етеді. Қазақстан бойынша қырық мыңнан астам адамды сан соқтырған ұйымның қылмысы 2018 жылы ашылған еді. Алайда бүгінгі күнге дейін оның тек басшысы ғана сотталыпты.
«Unnity corporation» қаржылық пирамидасына оңбай алдандық дегендер бүгін ақ қағазға жазылған ұран ұстап, ақшаларын қайтаруды талап етіп келіпті. Сөздерінше осыдан үш жыл бұрын елде жоқ мобильді қосымша ойлап таптық деген компания Қазақстан бойынша қырық мыңнан аса адамнан ақша жинап алған. Ал азаматтар "компанияға ақша құйып, адам ертіп әкелсең күніне миллиондап қаржы түседі" деп алдады дейді.
ҚАРАКӨЗ АРҒЫНБАЕВА:
- Мына индрайвер, олх, крыша, колесо деген сияқтылар бәрі шет елдің программасы. Біздің экономикамыздың ақшасы сыртқа кетіп жатыр. Сондықтан сондайға ұқсас «Апорт» деген программа аштық деді. Үш пакетпен шақырды. 35 000, 70 000, және 350 000. Августың басында приложение қосылады, мировой обороттан күніне жоқ дегенде бес мыңнан түсіп отырады деді. Сөйтіп отырғанда августте жабылды да қалды.
ГҮЛЗАТ ОРАЗАЛИНА, тұрғын:
– Біз міне, осында қара халық осыған дейін алданып, біз осындай ақшамызды салып 350 мың теңгемді міне. Әлі күнге дейін жүрміз. Қазір төрт жылға таяп қалды. Әлі ешқандай хабар жоқ біздерге. Мына сот тезірек бітсін. Халықтың ақшасы қайтарылсын.
Осыдан екі жыл бұрын дәл осы пирамиданы құрған Қуаныш Жақсыбаев сот үкімімен алты жарым жылға сотталған еді. Ал қазір сол қаржылық ұйымның жұмысын жүргізген тағы тоғыз сыбайласы жауап беріп жатыр.
ГҮЛАЙНА НҰРЖАНОВА, Ақтөбе қаласы №2 сотының баспасөз хатшысы:
– ҚР ҚК 217 бабының 3 бөлігі 2 тармағымен сотқа берілген Жақсыбаевқа, Жумабаевқа және тағы басқа сотталушыларға қатысты қылмыстық іс қаралуда, Аталған іс сотқа 2020 жылдың мамыр айының 28-де түсіп, маусымда алдын ала тыңдай өткізілді. Қылмыстық іс бойынша 2840 азамат жәбірленуші ретінде танылған. Қазіргі таңда сот тергеуі жүргізіліп жатыр.
Ұзаққа созылған процестің нақты қашан аяқталатыны әзірге белгісіз. Алайда салымшылар қаржылық ұйымды ашып, халықты алдап ақша жинағандар заң бойынша жазасын алып, салған ақшамызды түгел қайтарып берсін деп отыр.
Жанар Қожанова, Бағдат Баймурзин
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#информбюро #басты_жаңалықтар
