Նախկին զինդատախազ Գագիկ Ջհանգիրյանը վատ է զգում, որ քաղաքական ուժերը հեռանում են ՀԱԿ-ից. «Հատկապես մի քաղաքական ուժի համար, որի մեջ բազմաթիվ քաղբանտարկյալ ընկերներ ունեմ»։
Պարոն Ջհանգիրյանին հասկանալի չէ Լիբերալ եւ Հանրապետություն կուսակցությունների որոշումը, նրան մնում է հարգել նրանց որոշումը եւ աղոթել առ Աստված, որ հետագա քաղաքական գործունեության մեջ ճիշտ դուրս գան
«Ողբերգություն էլ չարժե դրանում տեսնել, որովհետեւ քաղաքական պայքար է»,- ասաց նա։
Ըստ Կոնգրեսականի, կան ՀԱԿ-ից դուրս եկողներ, կլինեն նաեւ ՀԱԿ մտնողներ, բացի դրանից հասարակությունն, ըստ նրա, ավելի ընդդիմադիր է դարձել. «Տարիները լիովին ապացուցեցին, որ իշխող ռեժիմն ունակ չէ որեւէ փոփոխության»։
Գագիկ Ջհանգիրյանը չի կարծում, որ Արամ Սարգսյանի եւ Հովհաննես Հովհաննիսյանի կուսակցությունների հեռանալով՝ ՀԱԿ-ը կթուլանա. Կոնգրեսն արդեն Հայաստանի քաղաքական կյանքի անբաժանելի մասն է
«Ինչքան էլ անհատական մենք կորուստներ ունենանք, քաղաքական կորուստ չեմ կարծում, որ կունենան»,-ասաց նա։
Առաջիկա աշնանային նախընտրական իրավիճակը իրավաբան կոնգրեսականի կարծիքով կապացուցի, որ ՀԱԿ-ը լուրջ կորուստներ չի կրել քաղաքական ուժերի հեռացումով։ Ավելին ՀԱԿ-ն, ըստ նրա, համալրումներ կունենա։
Համալրումներին, նրա կարծիքով, կօգնի նաեւ այն, որ ՀԱԿ-ի առջեւ որպես պատգամավորական խմբակցության կբացվեն հեռուստաընկերությունների դռները, նրանք այլեւս չեն կարող մերժել պատգամավորական խմբակցությանը։
