CBC xəbər verir ki, Əfqanıstanın Azərbaycandakı səfiri Mohammad Taqi Xalili bildirib ki, təhlükəsizlik problemi Əfqanıstanın inkişafı qarşısında duran ən böyük əngəl olaraq qalır. Onun sözlərinə görə, bu maneələrin aradan qaldırılması üçün əsas yol beynəlxalq cəmiyyətin dəstəyidir.
Səfir Azərbaycan-Əfqanıstan münasibətlərindən məmnunluğunu açıqlayıb. Bildirib ki, iki ölkə arasında dostluq münasibətləri bir çox sahələri əhatə edir. Rəsmi Kabil xüsusilə ölkənin müdafiə və təhlükəsizlik qüvvələrinə göstərilən dəstəyi yüksək qiymətləndirir.
Əfqanıstanın Azərbaycandakı səfiri Mohammad Taqi Xalili Azərbaycanla münasibətlərindən söz açıb: “Biz Azərbaycanla yaxşı münasibətlər qurmağa həmişə çalışmışıq. Bu məqsədlə Əfqanıstandan böyük nümayəndə heyəti Azərbaycana gəlib. Biz bir çox sahələrin, xüsusilə də təhsil sahəsində əlaqələrin daha da inkişaf etməsi üçün çalışırıq. Azərbaycanda əfqanıstanlı tələbələr çoxdur. İstəyirik ki, Azərbaycanda əfqan tələbələrin sayı daha da artsın”.
Mədəniyyət və turizm naziri Əbülfəs Qarayev bildirib ki, Əfqanıstanla 1994-cü ildən əsası qoyulan əməkdaşlıq indi yüksək səviyyədə davam etdirilir. Hər iki ölkə beynəlxalq təşkilatlarda da əməkdaşlıq edərək, bir-birinə dəstək olur, müxtəlif mövzularda həmrəy fikir nümayiş etdirilir.
