Bu həftə UNESCO-nun Bəşəriyyətin Qeyri-Maddi Mədəni İrsinin qorunub saxlanması üzrə 12-ci Hökumətlərarası Komitəsinin iclasında ermənilərin Azərbaycana məxsus dəyərləri oğurlamaq ənənəsinə növbəti zərbə vuruldu. Azərbaycanın dolma haqqında müraciəti qəbul edildi - özü də heç bir dəyişiklik və redaktə olunmadan… Azərbaycan bir daha beynəlxalq tribunadan sübut etdi ki, ermənilər yalan danışır. UNESCO səviyyəsində təsdiqləndi ki, “dolma” sözü “doldurma” türk sözündən yaranıb və ermənilər heç bir haqla bu ada iddia edə bilməzlər
UNESCO-nun Qeyri-maddi Mədəni İrsin Qorunması üzrə Hökumətlərarası Komitənin 12-ci sessiyasında milli kulinariyamızın növlərindən olan dolma və kamança simli musiqi alətinin bu qurumun Qeyri-maddi Mədəni İrs üzrə Reprezentativ siyahısına daxil edilməsi Azərbaycanın siyasi və mədəni baxımdan növbəti uğurudur.
Analitiklərin fikrincə, bu, həm də Azərbaycan diplomatiyasının qələbəsidir. Çünki Azərbaycan UNESCO-da əminliklə nümayiş etdirdi ki, zəngin mədəniyyətə və tarixə malikdir, xalqımıza məxsus olan mədəni dəyərləri ermənilərin mənimsəməsinə heç vaxt imkan verməyəcək.
UNESCO-nun bu dəfəki toplantısında Azərbaycanın hər iki müraciətinin müsbət qiymətləndirilməsi təsadüfi deyil. Mədəniyyət və turizm naziri Əbülfəs Qarayev bildirir ki, Azərbaycan buna qədərki erməni təxribatlarından sonra toplantıya daha hazırlıqlı yollanıb. Ermənistan tərəfi tutarlı cavablarla susdurulub.
UNESCO ilə əməkdaşlığın inkişafında və mədəni irsimizin qorunması və dünya miqyasında təbliğində Azərbaycanın Birinci vitse-prezidenti, Heydər Əliyev Fondunun prezidenti, UNESCO-nun və ISESCO-nun xoşməramlı səfiri Mehriban Əliyevanın müstəsna rolu var. Xanım Mehriban Əliyevanın dəstəyi ilə hazırda kamança hazırlanması və ifaçılıq sənətindən başqa, dolma hazırlama və paylaşma ənənəsi, Azərbaycan muğam ifaçılığı, lavaş bişirmə və paylaşma ənənəsi, Lahıc misgərlik sənəti, aşıq sənəti, Novruz bayramı, xalça sənəti, tar ifaçılığı, kəlağayı sənəti UNESCO-nun Qeyri-Maddi Mədəni İrs üzrə Reprezentativ siyahsında yer alır.Bununla yanaşı Çövkən – Qarabağ ənənəvi atüstü oyunu da UNESCO-nun təcili qorunmaya ehtiyacı olan qeyri-maddi mədəni irs siyahsındadır.
