Parlamenti Studentor i UP-së
Liberalizimi i Vizave
Sot jetojmë në një botë të globalizuar, ku shoqëritë, kombet dhe civilizimet janë të ndërthurura ndërmjet vete.
Kufijtë shtetëror ishin mure ndarëse për njerëzit e vendeve të ndryshme. Shembja e mureve ndërmjet shteteve i hapi rrugën e hapjes së këtyre kufijve dhe shndërrimin e tyre nga mure ndarëse në ura lidhëse për njerëzit që posedonin pasaporta të ndryshme.
Bashkimi Evropian është shembulli më i suksesshëm deri më sot për realizimin e këtij bashkimi, bashkimin e njerëzve të kombeve të ndryshme, madje edhe të atyre që kishin luftuar me shekuj ndërmjet vete.
Të bashkuar në diversitet!
Këtu nuk kanë përjashtim as studentët, të cilët janë energjia kryesore e ndryshimeve historike.
Zona Schengen apo zona e vendeve me lëvizje të lirë të njerëzve pa viza, u ka mundësuar sidomos studentëve të këtyre shteteve që të njihen me kulturat e ndryshme, të studiojnë e të mësojnë gjuhë të ndryshme dhe të miqësohen me studentët e kombësive të ndryshme.
Lëvizja e lirë është vlerë evropiane, një vlerë që i zhdukë dallimet dhe i integron shoqëritë. Është vlerë që e mundëson paqen e qëndrueshme.
Kosova edhe pse në Evropë, qytetarët e saj nuk mund të lëvizin lirshëm në këtë zonë, në zonën Schengen.
Kufizimi i lëvizjes së lirë më së shumti i dëmton studentët, të ardhmen e Kosovës. Ata mbesin të mbyllur dhe të izoluar, e pikërisht për këtë arsye edhe njohuritë, idetë dhe synimet e tyre mbesin të mbyllura dhe të izoluara.
Kosovës i duhen kuadrot me përvojë dhe me vlera evropiane, me vlera që vijnë nga lëvizja e lirë, këmbimi i lirë i vlerave demokratike, bashkëjetesa, toleranca, paqja dhe zhvillimi.
Liberalizimi i vizave për Kosovën nga Bashkimi Evropian do të ishte një ndër hapat më të rëndësishëm për zhvillimin e një rinie të shëndoshë dhe me njohuri të çmueshme.
Rinia e Kosovës, me institucionet tjera vendore, do t’i shtyj përpara proceset integruese të Kosovës në familjen e vlerave të mëdha, Bashkimin Evropian.
Bashkimi Evropian është premtim për rininë e Kosovës!
