Солтүстік Қазақстан облысында тағы 11 елді мекен қызыл судың астында қалуы мүмкін. Себебі Есіл өзені ернеуінен асты. Тұрғындарға ескерту айтылып, сақтық шаралары қолға алынды. Ал Ақтөбеде топан судың салдарын жою жұмыстары жүріп жатыр. Шаһарда төтенше жағдай жарияланған болатын. Қазір баспанасын су шайған азаматтар туған-туыстары мен уақытша қабылдау пункттерінде жайғастырылды.
Сергеев су қоймасында бүгін су деңгейі 3 метр 40 сантиметрге дейін көтерілген. Қазір мұнда секундына 3 мың 603 текше метр су тасталып жатыр. Мамандар мұндай жағдай бұрын-соңды болмағандығын айтады. Осыған байланысты сақтық шаралары күшейтілді
Асхат Ержанов, облыстық ТЖД жедел штабының жетекшісі:
-Есіл өзені қауіп төндіре бастады. Шал ақын, Есіл және Қызылжар аудандарындағы 11 елді мекен осы өзеннің жағалауында орналасқан. Бұл ауылдарда бүгінгі күні 400-ге жуық адам тұрады. Болжам бойынша 3-4 күннен соң су Петропавлға да жетеді. Бұлай бола қалса,«Заречный» елді мекені биыл тағы да су астында қалуы мүмкін.
Қазгидрометтің болжауынша, Ақтөбе облысында су тасқынының екінші легі болуы мүмкін. Дегенмен бүгін жағдай тұрақталды. Елек пен Сазды, Жіңішке мен Бұтақ өзендерінің деңгейі төмендеді. Сала мамандары Қарғалы су қоймасына жиналған қорды азайтуға кіріскенін айтты. Қазір мұнда секундына 350 текше метр су өтуде. Ал төтенше жағдайдан зардап шеккен тұрғындар үй-жай мәселесінің шешілуіне алаңдаулы. Саяжайларды аралаған облыс әкімі қираған баспаналарды өз көзімен көріп, тұрғындармен жүздесті.
Гүлбаршын Қамысбаева, Ақтөбе қаласының тұрғыны:
-Төрт немерем бар. Кенжесі – 2 айлық. Мектепке баруға жағдай болмайды. Бала кішкентай болғасын, біз ағайын-туманы жағалап жұрмыз. Үйім ортасына түсті. Сырты, қаңқасы тұр. Былтыр салып едім.
Бердібек Сапарбаев, Ақтөбе облысының әкімі:
-Құрылған комиссия жұмыс жасайды. Әрқайсысыңыздың үйіңіз зерттеліп, артынша шешім қабылдаймыз. Ең бастысы ешқайсысыңыз көмексіз, бақылаусыз, қараусыз қалмайсыздар.
Бір жарым мыңнан астам адам қауіпсіз аумаққа көшірілген. Олардың 820-сы уақытша қабылдау орталықтарына орналастырылды. Осы мақсатта 8 мектеп ғимараты мен 1 жатақхана арнайы жабдықталған. Ал су басқан жердегі 600-ге жуық баспананы тәулігіне 300 тәртіп сақшысы бақылайтын болды.
Қанат Әлиев, облыстық ІІД жергілікті полиция қызметінің басшысы:
-Кешеден бері 12 атты патрульді шығардық. Адам жүре алмайтын жерлерге атты патрульді жіберіп, сол жерде патрульдік режимде жұмыс жасаймыз.
-Полицейлер суға толы көшелерді атпен жүріп араласа, тұрғындар үйлеріне резеңке етікпен немесе қайықпен баруға мәжбүр. Қазір қалада саудагерлер осы екі өнімнің бағасын өсіріп жіберді. Базарда етік 10 мың, ал 2 орындық қайықты 60 мыңнан арзан табу мүмкін емес. Бұл да жығылғанға жұдырық болып тұр.
Авторлары: Мансұр Есқожин, Самат Қайырденұлы, Болат Молдағалиев, Төлеген Иманов
