Экспорт, импортын гол гарц болох Эрээн боомтод саатсан ачаа барааг төмөр замаар тээвэрлэхээр болжээ. Хилийн боомтод гацсан ачаа тээврийн эргэлтийг нэмэгдүүлэх чиглэлээр манай талаас хүсэлт тавьж ажилласны дагуу Эрээний хилийн боомтоор орж ирэх ачаа тээврийг төмөр замаар тээвэрлэхээр тохиролцоонд хүрлээ.
Цар тахлаас шалтгаалан дэлхийн олон улсад төдийгүй, БНХАУ-д дотооддоо ачаа тээврийн эргэлт удаашралтай байгааг БНХАУ-аас Монгол Улсад суугаа Онц бөгөөд Бүрэн Эрхт Элчит сайд Чай Вэньруй Монгол Улсын Шадар сайд С.Амарсайхантай уулзах үеэрээ хэлсэн байна. Тэрээр хөрш орнуудын ачаа тээврийг эрчимжүүлэхээр онцгой анхаарч ажиллаж байгааг мэдээллээ. Цаашид хилийн боомтуудаар нэвтрүүлэх экспорт, импортын автомашины тоог нэмэгдүүлж, БНХАУ-ын Тяньжин боомтод гацсан чингэлгүүдийг шуурхай тээвэрлэх хэлэлцээрүүдийг эрчимжүүлж байгаад Шадар сайд С.Амарсайхан талархал илэрхийлсэн байна.
Боомтын үйл ажиллагааг хэвийн горимд оруулах хүртэл байнгын ажиллагаатай Гадаад харилцааны яамны Төрийн нарийн бичгийн дарга Н.Анхбаяраар ахлуулсан ажлын хэсэг Замын-Үүдэд ажиллах юм байна.
#MNB #МонголынМэдээ #ЦагийнХүрд
Ещё видео!