Иғтикаф – ол арнайы ниетпен, рамазанның соңғы он күнін мешітте өткізу. Тек қажетті жағдайда ғана мешіттен шығады. Мәселен, дәрет алу немесе жұма намазына қатысу сияқты. Ал себепсіз бір сағатқа мешіттен шығып кетсе, иғтикафы бұзылады. Жұма оқылатын мешітке барып, жұма намазын оқып болған соң кідірмей кері оралады. Тек мешіттің ішінде тамақтануға, ұйықтауға және арнайы сауда-саттық ниетімен емес, қажеттілік туындаған жағдайда тауарларды сатуға немесе сатып алуға рұқсат. Сөйлеу иғтикафты бұзбайды. Тек сөйлеген сөзі жақсылық болуы керек. Үнсіздік иғтикафтың бір шарты деп санау – мәкрук.
Иғтикафтағы кісіге әйелімен қосылу және сүю, құшақтау сияқты қосылудың алғышарттарын жасауға тиым салынады. Тіпті, түн мезгілінде немесе күндіз, ұмытып немесе біле тұра құшақтау, сүюмен бойынан ұрық шықса иғтикафы бұзылады. Оның қазасын өтеуі керек болады.
Иғтикаф – сүннет муаккада ғалал-кифая. Кифая – аудан тұрғындары ішінен біреуі иғтикафта отырса, қалғандарының мойнынан түседі. Егер ешбір адам иғтикафқа кірмесе, сүннетті тәрк еткен болады. Аталған иғтикафтан өзге мұстахаб және уәжіп иғтикафтар бар. Мұстахаб иғтикафтың ең азы – бір сағат. Сондықтан мешітке кірген сайын иғтикафты ниет етсе, осы амалды орындаған болып саналады. Ал кімде-кім иғтикафты нәзір етсе, ол уәжіп болады, сосын нәзір иғтикафта ораза тұту шарт. Нәзір – ойлаған мақсатына жетер болса, Алла разылығы үшін осы құлшылықты (нәпіл ораза, садақа, Құран жаттау, иғтикаф, т.б.) бірін орындаймын деп уәде ету
Сұрақ: Бірнеше күн иғтикафта отырамын деп нәзір етуші адам осы күндерді түнімен қоса отыру керек пе?
Жауап: Иә, иғтикафқа күнмен қоса түн де кіреді. Сондай-ақ күндердің арасын бөлмей, қатарынан отыру да – шарт.

свернуть