Milli Məclisin bu gün keçirilən plenar iclasında “2021-ci il dövlət büdcəsi haqqında” qanun layihəsi üçüncü oxunuşda müzakirəyə çıxarılıb. Layihəni İqtisadi siyasət, sənaye və sahibkarlıq komitəsinin sədri Tahir Mirkişili təqdim edib. Bildirib ki, gələn il büdcə gəlirləri 25 milyard 427 milyon manat nəzərdə tutulur. Bu da gözlənilən Ümumi Daxili Məhsulun dəyərinin 33,6 %-i olmaqla, ötən illə müqayisədə 5,4 % çoxdur. Büdcə xərcləri isə 28 milyard 543 milyon manat müəyyənləşdirilib.
Hökumət üzvləri deputatların birinci və ikinci oxunuşda qaldırdığı məsələlərə münasibət bildirib. Maliyyə naziri Samir Şərifov deyib ki, son 5 ildə sosialyönümlü xərclərin büdcə xərclərində xüsusi çəkisi artıb. Gələn il dövlət büdcəsinin sosialyönümlü xərclərinin artımı 5,3% təşkil edib. Artıma səbəb yeni iş yerlərinin yaradılması, pandemiya ilə əlaqədar əhalinin həssas qruplarına edilən yardımlar, tələbə kreditləri və digər məsələlərdir.
Dövlət Sosial Müdafiəsi Fondunun dövlət büdcəsində gələn il üçün gəlir və xərcləri 5 milyard 146 milyon 30 min 160 manat müəyyən edilib. Əmək və əhalinin sosial müdafiəsi naziri Sahil Babayev bildirib ki, gələn ilin büdcəsi hesablanarkən əsasən şəhid və qazi ailələrinin sosial müdafiəsi nəzərə alınıb. Bu məsələ ölkə prezidentinin daim diqqətindədir.
Müzakirələrdən sonra “2021-ci ilin dövlət büdcəsi haqqında” qanun layihəsi qəbul edildi. Eləcə də, büdcə zərfinə daxil olan sənədlər - Dövlət Sosial Müdafiə Fondu, İşsizlikdən sığorta fondu, yaşayış minimumu, ehtiyac meyarının həddi, büdcə sistemi haqqında qanun layihələrinini gələn il üçün büdcəsi təqdiqləndi. “Sosial müavinətlər haqqında” qanuna dəyişiklik layihəsi də üçüncü oxunuşda qəbul edildi. Dəyişikliyə əsasən, müddətli həqiqi hərbi xidmətdə olan hərbi qulluqçuların uşaqlarına da sosial müavinət veriləcək.

свернуть