Географија и местоположба
Шупли Камен — село во околината на Куманово, поточно лежи југоисточно од градот Куманово, лево од патот Куманово-Свети Николе, оддалечено 10км од Куманово. Соседни села се: Зубовце и Орашац од југоисток и југ, Доброшане од запад, Тромеѓа од север, Клечевце од исток.

Одредени места во атарот на селото ги носат следните имиња: Алаџарма, Краста, Габер, Орашки Мост, Оздрим, Доброшански Рид, Редене Крушке, Бабин Дол, итн.

Шупли Камен има разбиен тип. Се дели на Горно, Средно и Долно маало. Разбиеноста на селото настанала после Втората светска војна.

Историја
Денешното село Шупли Камен не е многу старо село, тоа настанало во првата половина на XIX век. Пред крајот на турското владеење целото село и сета земја биле чифлиски.

Во XIX век селото било дел од Кумановската каза во Отоманското Царство.

Според статистиката на Васил К’нчов („Македонија. Етнографија и статистика“) во 1900 година во Шупљи Камен живееле 344 жители, сите Македонци.

Според егзархискиот секретар Димитар Мишев, („La Macédoine et sa Population Chrétienne“) во 1905 година во Шупљи Камен имало 328 Македонци, под врховенството на Бугарската егзархија.

Во 2002 година во селото живеел 81 жител, од кои 80 Македонци и 1 Србин.



Родови
Шупли Камен е македонско село.

Според истражувањата на Јован Трифуноски во периодот од 1965 до 1972 година, родови во селото се:

Родови кои живееле во селото за време на османлиското владеење: Јастребовци (12 к.) доселени се во првата половина на XIX век од „Јастреб Планина“. Возможно е да се од селото Јастребац кај Бујановац; Мургашци (10 к.) доселени се од селото Мургаш; Мазници (5 к.) доселени се од околината на Врање; Слупчанци (5 к.) доселени се околу 1860 година од денес албанското село Слупчане; Клинчаровци (5 к.) доселени се од селото Пезово; Бирдевци (2 к.) доселени се од селото Младо Нагоричане; Чумљаци (3 к.) доселени се од селото Скачковце; Пројичанци (5 к.) доселени се од селото Проевце; Калејци (2 к.) доселени се од селото Милутинце, Кривопаланечко; Шерковци (5 к.), Шошковци (4 к.), Балтевци (3 к.), Митковци (3 к.), Глогинци (3 к.), Стојилковци (3 к.), Стојковци (2 к.), Мренчевци (2 к.), Мицевци (2 к.) и Сипел (1 к.) доселени се, но не знаат од каде. Стојковци е еден од најстарите родови, а родовите Глогинци и Мицевци потекнуваат од ист предок.
Родови доселени после турското владеење: Антиќи (2 к.) доселени се од селото Трговиште, Горна Пчиња (денес во Србија); Јаќимовци (2 к.) доселени се од селото Одрено, Кривопаланечко; Арсевци (2 к.) и Тодоровци (2 к.) доселени се од селото Милутинце, Кривопаланечко; Дедо Ванковци (1 к.) доселени се од селото Радибуш, Кривопаланечко.

свернуть