«Քաղաքացու որոշում» (ՔՈ) կուսակցությունում սահմանադրական բարեփոխումների նպատակով խումբ ձևավորելու որոշումը համարում են անհրաժեշտ, բայց ուշացած:
Օրեր առաջ «Ազատության» «Ֆեյսբուքյան ասուլիսի» ժամանակ արդարադատության նախարար Ռուստամ Բադասյանը հայտարարեց, որ ձևավորվելու է հատուկ խումբ սահմանադրական բարեփոխումների նպատակով, որը կազմավորվելու է 2020 թվականի փետրվարին։
Արտախորհրդարանական «Քաղաքացու որոշում» կուսակցության գործադիր մարմնի քարտուղար Սուրեն Սահակյանը պնդում է՝ հեղափոխության օրակարգը, որի պաշտպանության համար էլ ստեղծվել է իրենց կուսակցությունը, դեռևս տեղ չի գտել Սահմանադրությունում, չնայած ժամանակին օրակարգը ընդունելի էր նաև գործող վարչապետ Փաշինյանի համար։
«Դրանք հանրային հարաբերություններն են արդարադատության ոլորտում, թե ինչպիսին ենք ուզում տեսնել արդարադատության ոլորտը, դրանք հարաբերություններն են, որոնք պետք է կարգավորեն նախկին թալանած միջոցների հետ վերադարձի և այդուհետ այդ մարդկանց հետ հարաբերությունները, հանրություն, կոռուպցիոն քաղաքական համակարգ։ Դրանք հարաբերություններն են ընտրողների և ընտրվողների միջև, էդ շրջանակներում պետք է փոխենք կուսակցությունների մասին և Ընտրական օրենսգիրքը, սահմանադրական օրենքները և հետկանչի մեխանիզմների ներդնում ու հանրաքվեների մեխանիզմների պարզեցում», - նշեց Սահակյանը։
