Халық сынына ұшыраған Ақселеу Сейдімбектің мына ескерткіші ашылғанына бір тәулік өтпей жатып бұзылып тынды. Ұлытау облысында этнограф-ғалымның құрметіне қойылған бұл мүсінді жұртшылық "ұсқынсыз" деп әбден сынаған еді. Әрі сәтсіз ескерткіштің ашылуына қатысқан өңір әкімі Берік Әбдіғалиұлы "қайда қарады?" деп наразылық білдірген. Алайда, әкімдіктегілер ескерткіш Ақселеу Сейдімбектің туыстарының қаражатына жасалды деп ақталды. Жалпы соңғы уақытта елімізде осындай дене бітімі сай келмейтін "сұрықсыз ескерткіштер" жасап, көп ұзамай оны бұзу қалыпты жағдайға айналып барады. Әріптесім Диана Сапарқызы бұған дейін елдің сынынан соң алынған мүсіндердің қазіргі тағдырын зерттеп көрді.
Күні кеше белгілі ғалым Ақселеу Сейдімбектің сексен жылдығына орай Ұлытау облысы, Жаңарқа ауданында ескерткіші ашылған болатын. Мүсіннің шымылдығы түрілгені сол еді, зиялы қауым өкілдері мен жұртшылық бірден сынға алды. Әсіресе желі қолданушылары «таяғы тізесінен келеді», «аяғын жеп қойыпты» деген сыни пкірлерін бұрқыратты.
ЕРСІН МҰСАБЕКОВ, журналист:
– Бұл жерде енді Ақаңды таба алмадық. Төрт жағынан қарадық. Ақаңды таба алмадық. Бет келбеті де, дене тұрқы да мүлде келмейді деп айтуға болады. Ақаң келбетімен ғана емес, жүріс-тұрысымен де ұлттың ұландарына өнеге болатын тұлға еді.
Осы шудан кейін әкімдіктегілер сәтсіз ескеркішті бір тәулікке жеткізбей бұзып тастады. Жаңарқа ауданының әкімдігі орнына сапалы мүсін қайта тұрғызылатынын хабарлады. Белгілі болғандай ғалымның ескерткішін туған-туыстары өздері тапқан белгісіз мүсіншіге жасатыпты. Қаржысын да өздері көтерген.
ЕРНАР СЕЙДІМБЕК, Ақселеу Сейдімбектің ұлы:
– Ол мүсіншінің аты жөнінде білмейміз біз. Ол мүсіншіні ағайынымыз өзі тауып ой керемет мүсінші ол жасап жатыр жасайды дегеннен кейін бәріміз сеніп қалып тапсырған едік.
Бұл көпшіліктің көңілінен шықпаған бірінші ескерткіш емес. Мәселен, осыдан үш жыл бұрын Семейдегі Мәншүк Мәметованың демеушілер қолдауымен қойылған ағаш мүсіні дау туғызып, кейін алынып тасталды. Әзірге батыр қыздың жаңа мүсіні дайын болмай шықты. Ал екі жыл бұрын Алматы облысы, Бақанас аулында 12 миллион теңгеге жасалған Дінмұхамед Қонаевтың ескеркіші де елдің сынынан соң алынған болатын. Денесі еңгезердей, басы кішкентай ескерткіш қайта жөнделіп, биыл шымылдығы түрілді. Ал Өскеменде сегіз жыл бұрын ұлы Абайдың ергежейліге ұқсаған ескерткіші бір тәулікке жетпей алынған болатын. Бірақ, әкімдік ақынның бұл ескерткішін "қайта жаңғыртамыз" деген уәдесін сол күйі орындаған жоқ. Қазыр орны қаңырап бос тұр. Ал, елдегі монументтік өнер құрылыстарын орнату жөніндегі комиссия мүшесі Ринат Әбенов, даулы мүсіндердің эскизін көрмегенін айтады. Яғни мүсін авторлары мемлекеттік комиссия келісісімнсіз іске кіріскен.
РИНАТ ӘБЕНОВ, ҚР Мәдениет және спорт министрлігі жанындағы монументтік өнер құрылыстарын орнату жөніндегі комиссияның мүшесі:
– Айтып отырған даулы ескерткіштер біздің комиссияның қарауына түспеді. Өз басым оның эскиздерін көрген емеспін. Егер авторлар комиссиямен келісіп жасағанда, барлық жағынан кеңес беріп түзетуер енгізер едік.
Ринат Әбеновтың айтуынша, елде ескерткішті орнатпас бұрын, алдымен туындының эскизі мен жобасы комиссиямен қаралады. Одан кейін мәдениет министрлігі мен қоғам қайраткерлерінің мақұлдауымен ескерткішті қоюға рұқсат беріледі.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
