Soldurub bağını, töküb barını,
Daha şuxdan salıb yarpaqlarını,
Soldurub o çıraq yanaqlarını
Qış olub, üstümə niyə gəlmisən?
----------------------------------------------------------
Sən adlı o xanım-xatını mənə,
Vermədin öz şahlıq taxtını mənə.
Qıymadın gül-çiçək vaxtını mənə,
Qış olub üstümə niyə gəlmisən?
----------------------------------------------------------
Məni həsrət qoyan ilk bəhərinə
İndi gəlib məni yada salıbmı?!
Gözünün alovu özgələrinə,
Saçının qırovu mənə qalıbmı?
Qış olub üstümə niyə gəlmisən?
----------------------------------------------------------
Gözəllik - neylədin o bəxşişini,
Gəlmisən, bəs kimə bəxş etdin onu?
Nə bildin taleyin göndərişini
Qaytara bilmərəm, nə bildin bunu?
----------------------------------------------------------
Nə bildin mən bir az ürəyi kövrək,
Qadın baxışında mütiyəm, lalam.
Nə bildin bu həsrət məni əyəcək,
Nə bildin səninçün keçilmiş yolam.
Qış olub üstümə niyə gəlmisən?
----------------------------------------------------------
Ağlayan hirsimi soyutmağamı,
İncik ürəyimi uyutmağamı?
Təkəbbürlü xanım, a nazlı xanım,
-----------------------------------------------------------
Yox, yox, bu yalvarışı saxla, sən Allah.
Bu yazıq baxışı saxla, sən Allah.
Di bəsdir, bu fəndi, fitnəni, saxla,
Gücün var keçəni qaytar, soraqla,
Qış olub üstümə niyə gəlmisən?
----------------------------------------------------------
Mən ki unutmuşdum eşq əzabını
Taleyin qarğışı niyə gəlmisən?
Məndə yandırdığın o çıraq sönüb,
Ay gözümün yaşı, niyə gəlmisən?

свернуть