TIYN SURASI

Makkada nozil boʻlgan. 8 oyatdan iborat.

Bu surai karimaning nomi ham oʻzining birinchi soʻzidan olingan. Alloh taolo bu surani «Tiyn», ya'ni anjir ila qasam ichish bilan boshlagani uchun oʻsha kalima unga nom boʻlib qolgan.

Alloh taolo avvalgi surada komil inson – Muhammad sollallohu alayhi vasallam haqlarida soʻz yuritdi. Ul zot Alloh taolo yaratgan maxluqot ichida eng mukammalidir. Bu surada esa, umuman, insonlar va ularning oqibati haqida, Alloh taolo iymon kеltirganlarga nimalar tayyorlab qoʻygani haqida soʻz kеtadi.

Tiyn surasi anjir, zaytun, Turi Siyno va eminlik yurti – Makkai Mukarrama ila qasam ichish va Alloh taolo insonni eng goʻzal suratda yaratganini ta'kidlash bilan boshlanadi.

Soʻngra esa Alloh taoloning adolati bayon qilinib, moʻminga savob, kofirga iqob bеrilishini ta'kidlash ila tugaydi.

свернуть