Қазақтың соңғы ханы - Кенесары Қасымұлының бас сүйегін елге қайтарып, арулап жерлеу керек. Тәуелсіздікті сақтау үшін қасық қаны қалғанша күрескен ханға құрмет көрсету қазіргі ұрпақтың парызы дейді тарихшылар. Сондықтан, олар бұл мәселеге бей-жай қарамауға шақырып отыр. Ал биыл әйгілі қолбасшының туғанына 220 жыл толды. Осыған орай Алматы облысында "Бабалар мұрасы" атты республикалық фестиваль өтті.
Ұлт-азаттық көтерілісінің әйгілі басшысы, қазақтың соңғы ханы Кенесары Қасымұлының мүрдесі қырғыз жерінде қалса, бас сүйегі Ресейдегі "Эрмитаж" мұражайында тұрғаны айтылады. Бұған дейін ханның сүйегін елге қайтару мәселесі талай көтерілген. Тіпті арнайы белсенді топ құрылып, Ресей президентіне петиция да жолданған еді. Алайда, бастама сол күйі аяқсыз қалды. Ал тарихшылар халықтың мүддесін қорғаған ханды ұлықтауды тоқтатпау керек дейді.
ХАНКЕЛДІ ӘБЖАНОВ, Тарихшы:
– Бас оралса қазақтың тағы бір жоғы түгенделеді, тағы бір ісі алға басады деп ырымдайды да. Егер табылып жатса құба құп. Бар мәселе Кенесарыны ұлықтау. Өткені, осыншама жер, осыншама байлық сол батырлардың арқасында бізге бұйырып тұр.
Даңқты қолбасшының ерлігін дәріптеу үшін "Батыр бабалар" мемориалды музейінде республикалық фестивалі өтті. Келушілер концерттік бағдарлама тамашалап, қазақтың дәстүрлі қару-жарақтарын заманауи үлгіде жаңғыртқан шеберлердің сабақтарын тыңдады. Сондай-ақ, музей қорындағы құнды жәдігерлерді көрді. Айта кетсек, мемориалдың ашылғанына биыл 5 жыл толып отыр.
АЙДАНА МЕЙРАМБАЙҚЫЗЫ, Тілші:
– "Батыр бабалар" мемориалды музейінде қазіргі уақытта 150 экспонат тұр. Олардың ішінде батырлардың сауыт-саймандары, қару-жарақтары мен этнографиялық бұйымдар бар. Ал музейдегі ең құнды экспонат Кенесары ханның қарындасы, Бопай ханымның қылышы екен.
Ұзындығы 1 метрге жуықтайтын бұл қылыш 1845 жылы Ресейдің Санкт-Петурбург қаласында жасалған. Бірақ Қазақстанға қай жылы және қандай жолмен жеткізілгені белгісіз.
ОРЫНБАСАР ӘЛІМ, "Батыр бабалар" мемориалды музейінің меңгерушісі:
– Сондай-ақ, 18-19 ғасырларға тән бірегей артефактілер, қылыш, қалқан, жеңсе, дулыға сияқты батырлардың қару-жарақтарымен қатар білте мылтық, семсер, селебе сияқты кесу, шабу құралдарын атап өтуге болады.
Мемориалды мұражайға қазақтың тарихына қызыққан Америка, Жапония, Корея мемлекеттерінің азаматтары да көптеп келеді екен.








Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31

свернуть