10-ХАДИС
Әбу Һурайра (р.а.) былай деп баяндаған: «Алла елшісі ﷺ айтты: «Расында, Алла – Тойиб (Пәк, таза), сондықтан Ол тек таза нәрсені ғана қабыл етеді. Шын мәнінде, Алла елшілерге бұйырғанын мүміндерге де бұйырды. Алла Тағала Құран Кәрімде айтты: {Ей, елшілер! Таза ризықтардан жеңдер де, ізгі амал істеңдер} (Муминун, 51). Басқа аятта: {Ей, иман келтіргендер! Ризық бергендеріміздің тазасынан жеңдер} (Бақара, 172).
Сонан соң пайғамбар ﷺ ұзақ жол жүріп келген шашы ұйпа-тұйпа, үсті-басы шаң, қолдарын көкке қарай көтеріп: «Уа, Раббым! Уа, Раббым!», - деген адамды еске алып: "(Алайда) Жегені харам, ішкені харам, кигені харам және хараммен азықтандырылған. Оның дұғасы қалайша қабыл болсын?!", - деп айтты». Хадисті Муслим жеткізген.
