TIRANE- Gjykata e Krimeve të Rënda ka vendosur arrest me burg për Gate Mahmutajn dhe dy nga 14 të arrestuarit në Lazarat, pasi akuzohen se qëlluan me armë në drejtim të efektivëve të policisë gjatë operacionit në Lazarat. Mbi Gate Mahmutajn rëndojnë dy akuza, ajo për tentativë vrasje të punonjësve të policisë dhe kultivim të lëndëve narkotike, ndërsa Matias Boci dhe Emiliano Aliko akuzohen vetëm për tentativë vrasje ndaj policëve.
Tre të pandehurit mësohet se kanë mohuar akuzat, dhe janë shprehur se nuk kanë lidhje me çështjen.
Gate Mahmutaj është shprehur para togave të zeza në Gjykatën e Krimeve të Rënda se "Nuk kam lidhje me këtë çështje. Kur pashë emrin në listë, u vetëdorëzova. I kam parë veprimet e policisë në kapanonin tim, por nuk kam qëlluar". Gatja u shpreh se edhe armët e sekuestruara nuk janë gjetur në banesën e tij, apo objektet në pronësi të tij.
Sipas avokatit mbrojtës të Mahmutajt, Petrit Seriani, prokuroria nuk ka asnjë provë ndaj Gates.
Ndërkaq, Gjykata e Krimeve të Rënda ka dhënë masën e arrestit me burg edhe për Matias Bocin e Emiliano Aliko, të përfaqësuar nga avokati Baftjar Rusi, nën akuzën "tentativë vrasje të efektivëve të policisë".
Gjyqtar në këtë çështje ishte Gurali Brahimllari, ndërsa, prokurorë ishin Anton Martini, i cili u larguar për të ndjekur nga afër hetimet në Lazarat, dhe Përparim Kulluri.
Razip Mahmutaj, i njohur si Gate Mahmutaj, i cili u shpall në kërkim gjatë operacionit të zhvilluar nga policia në Lazarat, u vetëdorëzua në policia mbrëmjen e 18 qershorit. Mahmutaj cilësohet nga policia si një prej emrave më problematikë në botën e krimit, pasi edhe më parë është përballur me drejtësinë për akuza të rënda.
Ndërkaq, edhe dy të akuzuarit e tjerë, Boci dhe Aliko kanë mohuar të kenë qenë në Lazarat në kohën kur është zhvilluar aksioni i policisë, duke paraqitur dy DVD për të argumentuar se ndodheshin në Tiranë, në një servis.
Por këto fakte nuk kanë qenë bindëse për gjyqtarin që i ka lenë në arrest me burg tre të pandehurit.
Ndërkaq, Mahmutaj, Aliko dhe Boci janë shprehur se do të apelojnë masën e kërkuar nga prokuroria dhe e caktuar më pas nga gjyqtari i Krimeve të Rënda.
Caktimi i masës së arrestit i jep kohë Prokurorisë për të thelluar hetimet, për të provuar nëse ka pasur angazhim me persona të tjerë, por në seancën e sotme nuk është përmendur nga prokurori përfshirja e grupit kriminal, i cili mund të implikonte edhe persona të tjerë.
Në ambientet e jashtme të gjykatës kanë qenë miq dhe familjarë të të pandehurve, por nuk kanë qenë të pranishëm në seancat.
Pas vetëdorëzimit në polici, tre personat u dërguan në masa të rrepta sigurie në policinë e Tiranës, ku u dha sot nga Krimet e Rënda masa e "arrestit me burg".
Ndërsa masat për të arrestuarit e tjerë masa e sigurisë është parashikuar të merret nga Gjykata e Gjirokastrës, pasi edhe hetimet po zhvillohen atje.
- See more at: [ Ссылка ]
