Ақтөбеде Ұлы Жеңістің 70 жылдығына орайластырылған шаралар жалғасуда. Бүгін студенттер "70 қайырымды іс" акциясы аясында Ұлы Отан соғысының ардагерлері мен жалғызбасты қарияларға қол ұшын созды. Акцияны облыстық жастар ресурстық орталығы ұйымдастырды.
Бір топ жігіт зейнеткердің қар басып қалған ауласын тазартты. Студенттерге бұл жұмыс түкке тұрмады. Жұмылып жүріп, күреп, екіншісі үйіп, сыртқа шығарып жатыр. Бұлар-Ақтөбе өнеркәсіп, технологиялар және басқару колледжінің 1-курс студенттері. 84 жастағы Екатерина Попович жастарға алғысын жаудырды. Жақында ғана бір топ студент келіп, үйін тазалап берген. Қиын-қыстау заманды бастан өткерген әжейдің тілейтіні денсаулық. Өмір бойы колхозда жұмыс істеп, трактор айдаған зейнеткердің бүгінде екі тізесі бастырмайды. Студенттер бүгін жер үйде тұрып жатқан 10 ардагерге көмек қолын созды. Қар басып қалған аулаларды тазартып, қариялардың батасын алды. Жеңістің 70 жылдығына арналған қайырымдылық шара алда да жалғасын таппақ.
