Azərbaycan innovasiyaların iqtisadiyyatın bütün sektorlarına tətbiqində böyük irəliləyişə nail olub. Bu fikir dünən Bakıda işə başlayan VI Beynəlxalq Humanitar Forum çərçivəsində təşkil edilən “İnnovasiyalar yaradıcı iqtisadiyyatın yeni mənbəyi kimi” adlı plenar sessiyada səsləndirilib. Plenar sessiyanın moderatoru Rusiyanın Dünya İqtisadiyyatı və Beynəlxalq Əlaqələr İnstitutunun prezidenti Aleksandr Dınkin qeyd edib ki, bura müxtəlif mötəbər qurum və təşkilatların nümayəndələrinin toplaşdığı və qarşılıqlı fikir mübadiləsi apardığı əlverişli platformadır.
Nəqliyyat, rabitə və yüksək texnologiyalar nazirinin müavini Elmir Vəlizadə bildirib ki, Azərbaycanda innovasiyaların inkişafına dövlət dəstəyi göstərilir. Bu məqsədlə İnformasiya Kommunikasiya Texnologiyaları Fondu, Yüksək Texnologiyalar Parkı yaradılıb. Azərbaycanda innovasiyaların iqtisadiyyatın bütün sektorlarına tətbiqi, startapların təşviqi və qeyri-neft sektorunun inkişafına xüsusi diqqət yetirilir. Plenar sessiyada mövzu ilə bağlı müzakirələr aparılıb, suallar cavablandırılıb.
Forumun “Multikulturalizm siyasəti cəmiyyətdə sabitliyin təminatı amili kimi” panel sessiyasında qeyd olunub ki, bu gün Azərbaycanın multikulturalizm modeli dünyada qəbul edilir və öyrənilir. Bu gün Azərbaycan multikulturalizmi dünyanın bir sıra aparıcı universitetlərində - İtaliya, Almaniya, İsveçrə, Rusiya, Gürcüstan, Litva və digər ölkələrin ali məktəblərində tədris olunur. Xarici universitetlərdə Azərbaycan multikulturalizmini öyrənən tələbələrin ildə iki dəfə ölkəmizə səfərləri təşkil edilir. Bir sözlə, Azərbaycan artıq dünyada multikulturalizm mərkəzi kimi tanınmaqdadır.
Çıxışlarda vurğulanıb ki, Azərbaycan torpaqlarında müsəlmanlarla yanaşı, pravoslavlar, katoliklər, yəhudilər və digər etiqad sahibləri əsrlərboyu bir ailə kimi yaşayır, ibadət və mərasimlərini sərbəst şəkildə icra edirlər. Azərbaycanda daxili sabitlik mövcuddur. Milli və dini tolerantlıq dövlət səviyyəsində dəstəklənir. Etnik və dini müxtəliflik ölkəmizin milli sərvəti kimi dəyərləndirilir.
Çıxışlar zamanı bir daha qeyd olunub ki,Azərbaycanda dövlət və xalq tərəfindən multikultural dəyərlərə çox böyük önəm verilir. Azərbaycan xalqı humanist olmaqla yanaşı, həmişə başqa dinlərə və digər dövlətlərdə yaşayan insanlara qarşı loyal münasibət bəsləyib.
Forum işini bu gün müxtəlif mövzulara həsr edilmiş panel sessiyalarla davam etdirir.
