نێچیرڤان بارزانی نێوەڕۆکی سەردانەکانی بۆ بەغدا و تاران ئاشکراکرد و راشیگەیاند، ئەم هەفتەیە لە داڤۆس جارێکی دیکە لەگەڵ عەبادی کۆدەبێتەوە.
دوای کۆبوونەوەی ئەنجوومەنی وەزیران، لە کۆنگرەیەکی رۆژنامەڤانیدا لە هەولێر، نێچیرڤان بارزانی، سەرۆکوەزیرانی هەرێمی کوردستان رایگەیاند "لەگەڵ حەیدەر عەبادی، سەرۆکوەزیرانی عێراق باسی (مووچە، نەوت، فڕۆکەخانەکان و دەروازەکان)مان کرد، ئەوان لیژنەیان دروستکردووە، بەردەوام لە پەیوەندیدا دەبین، بەو هیوایەی بگەینە چارەسەر بۆ هەموو کێشەکان".
سەرۆکوەزیران نێچیرڤان بارزانی دەڵێت "بە بۆچوونی ئێمە لە هەرێمی کوردستان ئەو سەردانە سەرەتایەکی باشە بۆ دەستپێکردنی گفتوگۆ و چارەسەرکردنی ئەو کێشانەی کە لەنێوانی هەرێمی کوردستان و بەغدادا هەن".
لەبارەی باسکردنی پرسی مووچە لە بەغدا، نێچیرڤان بارزانی گوتی "نەک تەنیا وەزارەتەکانی پەروەردە و تەندروستی، بەڵکو باسی مووچەی وەزارەتەکانی دیکەشمان کرد، بەڵام ئەوەی گرنگە ئەو دوو وەزارەتە تەواو ببێت، هیوادارین ئەوانی دیکەش بگرێتەوە".
سەبارەت بە کردنەوەی فڕۆکەخانەکانی هەولێر و سلێمانی، نێچیرڤان بارزانی رایگەیاند، هیچ وادەیەکی دیاریکراو نییە، هەندێک کێشەی هونەری هەن کە هیوادارین بەزووترین کات چارەسەربکرێن و گەشتیی نێودەوڵەتی فڕۆکەخانەکانی کوردستان دەستپێبکەنەوە.
نێچیرڤان بارزانی کە یەکێک لە بەشداربووانی کۆڕبەندی ئابووریی داڤۆسە و لە رۆژی سێشەممە 23-1-2018 دەستپێدەکات، ئاشکراشیکرد جارێکی لەگەڵ حەیدەر عەبادی کۆدەبێتەوە، هەر لە داڤۆس چاوی بە وەزیری نەوتی عێراق دەکەوێت، کۆبوونەوەکانیش بەردەوامی کۆبوونەوەکانی رابردوو دەبن.
لە وەڵامی پرسیارێكی (تۆڕی میدیایی رووداو)دا کە ئایا لە سەردانەکانیاندا هیچ رێککەوتنێکیان لەگەڵ عێراق و ئێران واژۆکردووە، نێچیرڤان بارزانی گوتی "نەخێر تەنیا بۆ ئاساییکردنەوەی پەیوەندییەکان بوو و هیچ رێککەوتنێکمان واژۆنەکرد".
سەبارەت بە هەڵوێستی هەرێمی کوردستان لەبارەی عەفرین، نێچیرڤان بارزانی گوتی: "ئەوەی لە عەفرین روودەدات جێگەی نیگەرانی گەورەی هەرێمی کوردستانە و هیوادارین و داوادەکەین بەزووترین کات بە کەمترین زیان بگەنە رێککەوتن، نیگەرانی گەورەی ئێمە ئەو مەدەنییانەن کە لە عەفریندان".
سەرۆکوەزیرانی کوردستان باسی سەردانەکەی بۆ تارانیش کرد و رایگەیاند "تەئکید لەسەر پەیوەندی مێژوویی نێوان هەرێمی کوردستان و ئێران کرایەوە. ئەوان رەغبەتی خۆیان پیشاندا بۆ ئەوەی پشتگیری لە مافە دەستوورییەکانی هەرێمی کوردستان بکەن، ئەگەر بتوانن رۆڵێک ببینن لە چارەسەرکردنی ئەو کێشانەی لەنێوان هەولێر و بەغدا هەن لە چوارچێوەی دەستووری عێراقدا".
نێچیرڤان بارزانی ئاماژەی بەوەکرد، لە کۆبوونەوەی لەگەڵ سەرۆککۆمار و سەرۆکی پەرلەمان و بەرپرسانی باڵای ئێران باسیان لەوەشکردووە، چۆن بتوانن ئاڵوگۆڕی بازرگانی لەنێوان کۆماری ئیسلامی ئێران و هەرێمی کوردستاندا زیاتر بکەن لەوەی کە ئێستا هەیە. "تەئکید لەسەر ئەوە کرایەوە کە دەبێت رێککاری پێویست بگرینەبەر بۆ ئەوەی ئاڵوگۆڕی بازرگانی و کاری وەبەرهێنان لە هەردوولا زیاتر بکرێت، کە رەنگدانەوەی ئەو پەیوەندییە مێژووییە بێت لەنێوان گەلی کوردستان و ئێراندا هەیە".
