Erməni silahlı birləşmələri Xocavənd rayonunun Qaradağlı kəndində yaşayan 200-dən artıq azərbaycanlı ailəsini məcburi hərəkətlərlə didərgin salmaq məqsədi ilə 1988-ci ilin fevral ayından başlayaraq 14 fevral 1992-ci il tarixədək müxtəlif vaxtlarda yaşayış yerlərinə və həyətyanı sahələrinə mütəmadi olaraq basqınlar edərək evlərini yandırıb qarət etmiş, nəticədə kəndin azərbaycanlı milliyyətindən olan 1008 nəfər əhalisindən 892-ni Beynəlxalq hüquq normaları və Azərbaycan Respublikasının qanunları ilə müəyyən edilmiş əsaslar olmadan doğma yerlərindən didərgin salmışlar.
Belə ki, Erməni silahlı birləşmələrinin üzvləri azərbaycanlıları bir milli qrup kimi məhv etmək məqsədi ilə cinayətkar hərəkətlərini davam etdirərək Xankəndi şəhərində dislokasiya olunmuş 366-cı motoatıcı alayın ağır texnikasından, yəni tanklardan, piyadaların döyüş maşınlarından, zirehli maşınlardan, silah və sursatlardan, habelə muzdlulardan istifadə edərək Xocavənd rayonunun Qaradağlı kəndinin 1008 nəfər sakinindən kənddə qalmış 116 nəfər azərbaycanlı əhalisini öldürmək məqsədi ilə 1992-ci ilin fevral ayının 14-də saat 20 radələrindən 17 fevral 1992-ci il saat 15-dək kəndi mühasirəyə almış, mülki əhalinin çıxmasına imkan verməmiş, kəndin kənarından həmin zirehli texnikadan, avtomat, pulemyot və digər odlu silahlardan kənddə yerləşən yaşayış evlərinə, dövlət müəssisələrinə, təhsil ocaqlarına mütamadi olaraq davamlı atəşlər açmış, nəticədə kənd sakinləri olan dinc mülki əhalidən 12 nəfər öldürülmüşdür.
Bundan sonra, onlar öz cinayətkar hərəkətlərini davam etdirərək, 17 fevral 1992-ci il tarixdə saat 15:30 radələrində hücum edib kəndə girərək kəndin sağ qalmış əhalisindən 104 nəfəri kəndin kolxoz idarəsinin ərazisinə yığıb uşaqları, qadınları, qocaları iki, kişi cinsindən olan cavan şəxsləri isə bir Kamaz markalı avtomaşının yük yerlərinə doldurub Qaradağlı kəndindən 2 km aralıda yerləşən «Bəylik bağı» adlanan əraziyə gətirərək kişi cinsindən olan cavan şəxsləri zorla maşından yerə düşürüb yaxın məsafədən odlu silahlardan davamlı atəşlər açaraq 36 nəfəri öldürmüş, 2 nəfərə ağır xəsarətlər yetirmiş, sonra isə öldürdüyü adamların meyitlərini həmin ərazidə əvvəlcədən traktorla qazılmış 2 silos quyusuna doldurub torpaqla örtmüşlər.
Həmin silahlı dəstənin digər üzvləri isə sağ qalmış 68 nəfəri avtomaşınların yük yerlərində apararkən kişi cinsindən olan cavan şəxslərin olduğu avtomaşını erməni əhalisinin yaşadığı Ninqi kəndində saxlayaraq 3 nəfəri, Xankəndi şəhərində saxlayaraq 5 nəfəri və Xankəndi şəhər təcridxanasının ərazisində 11 nəfəri maşından yerə düşürüb odlu silahlardan atəş açaraq öldürmüş, sağ qalmış digər 49 nəfər Qaradağlı kənd sakinini isə təcridxanaya təhvil vermişlər.
Erməni silahlı birləşmələrinin üzvləri 14-17 fevral 1992-ci il tarixlərdə Xocavənd rayonunun Qaradağlı kənd sakinlərindən 9-u azyaşlı, 10-u qadın, 14-ü 60 yaşdan yuxarı, 34-ü kişi cinsindən olan cavanlar olmaqla 67 nəfəri öldürmüş, 2 nəfərə həyat üçün təhlükəli olan sağlamlığa ağır zərərvurmaya aid xəsarətlər yetirmiş və 49 nəfəri girov götürmüş, eyni zamanda yaşayış binalarını və dövlət obyektlərini qarət edib yandırmışlar.
Azərbaycan Respublikasının ərazilərində qanunsuz fəaliyyət göstərmiş erməni separatçı rejiminin silahlı hərbi birləşmələri və Ermənistan Respublikasının Silahlı Qüvvələri tərəfindən yerli azərbaycanlı əhaliyə qarşı törədilmiş sülh və insanlıq əleyhinə, habelə müharibə və digər cinayətlərin araşdırılması məqsədi ilə istintaq-əməliyyat qrupu yaradılmışdır.
Cinayət işi üzrə Qaradağlı epizodu ilə bağlı bu günkü günədək 12 şəxs beynəlxalq axtarışa verilib.
[ Ссылка ]
[ Ссылка ]
[ Ссылка ]
#İTV
#İTVXəbər
#ictimaitv #video #televiziya #baku #videolar #itv
