Хабаргузории давлатии "Ховар" рӯзи 21 июни соли 2024 матни нави қонуни ҶТ “Дар бораи танзими ҷашну маросим дар Ҷумҳурии Тоҷикистон”-ро бо иловаҳои нав нашр кард ва бо ҳамин таҳрири ҷадиди ин қонуни ҷанҷолбарангез, ки дар ҷомиа ҳамчун қонуни манъи ҳиҷоб ва манъи идгардак ном баровардааст, пурра қувваи қонунро гирифт ва ба иҷро даромад.
Ду тағйироти асосӣ дар моддаҳои 9 ва 18 қонуни танзим ворид карда шудааст, ки дар ҷомиа ба мавҷи вокунишҳо рӯбарӯ шуд.
Дар қисми дуюми моддаи 9 “Ҷашнҳои расмӣ” чунин гуфта мешавад: “Дар рӯзҳои Иди Рамазон ва Иди Қурбон дастархони камхарҷи идона ороста шуда, исрофкорӣ, зиёдаравӣ, тақдими ширинӣ ва туҳфаҳои дигар (идгардак) манъ аст”. Ба ин тартиб, ин банди қонун аз ин баъд идгардаки кӯдаконро манъ мекунад. Дар матн синну сол нишон дода нашудааст ва аз ин рӯ, рӯшан нест, ки оё идгардак барои калонсолон ҳам манъ хоҳад шуд ё на?
Ва аммо тағйироти аз ҳама баҳсбарангез дар қисми панҷуми моддаи 18 “Уҳдадории шахсони воқеӣ ва ҳуқуқӣ ҳангоми гузарондани ҷашну маросим” ворид карда шудааст, ки ба ин қарор аст:
“Шаҳрвандон ва шахсони ҳуқуқии Ҷумҳурии Тоҷикистон уҳдадоранд рукнҳои фарҳанги миллӣ, аз ҷумла забони давлатӣ ва пӯшидани либосҳои миллиро риоя намоянд. Воридот, фурӯш, тарғиби либосҳои ба фарҳанги миллӣ бегона, инчунин дар ҷойҳои ҷамъиятӣ пӯшидани чунин либосҳо манъ мебошанд”.
Интизор меравад, ки бо қувваи қонунӣ гирифтани тағйироти ахир рейдҳои густарда ба зидди занону духтарони ҳиҷобпӯш вусъат бигирад. Бино ба иттилои дарёфтӣ, мақомоти шаҳру ноҳияҳо алакай аз ҳисоби намояндагони кумитаи занон, кумитаи дин ва ниҳодҳои ҳифзи ҳуқуқ гуруҳҳои вижае таъсис додаанд, ки дар кӯчаву бозорҳо ва дар даромадгоҳҳои биноҳои ҷамъиятӣ занону духтарони ҳиҷобпӯшро манъ ва рӯйхат карда, аз онҳо ба шакли “тоҷикӣ”, яъне ба тарафи қафо бастани рӯймолҳояшонро талаб хоҳанд кард. Нисбат ба онҳое, ки ин талабро рад мекунанд, аз ин ба баъд метавонанд протокол тартиб диҳанд.

свернуть