“Yeni sərhəd zastavası kompleksinin istifadəyə verilməsi president, ali baş komandan İlham Əliyevin rəhbərliyi altında dövlət sərhədlərimizin mühafizəsinin təşkilində növbəti uğurdur”. “Ləzə” sərhəd zastavası kompleksi xidmətinin istifadəyə verilməsi mərasimində Dövlət Sərhəd Xidmətinin rəisi – Sərhəd Qoşunlarının komandanı Elçin Quliyev belə deyib:
"Sərhəd zastavası kompleksinin açılışı çox əlamətdar bir hadisədir. Müstəqil dövlətimiz və dövlətçiliyimizin qorunması nöqteyi nəzərindən isə bu tarixi bir hadisədir. Bu həm də ciddi bir nailiyyətdir. Çünki yeni sərhəd zastavası kompleksinin inşası həmin ərazidə dövlət sərhədlərinin mühafizəsini keyfiyyətcə yeni bir mərhələyə qaldırır".
Yeni eksperimental layihə üzrə tikilən sərhəd zastavasında xidmətin yüksək səviyyədə təşkili və sərhədçilərin istirahəti üçün hər cür şərait yaradılıb. Zabit və gizir ailələri üçün inşa olunan mənzillər, müasir tələblərə cavab verən xüsusi təyinatlı otaqlar, yeməkxana, istirahət guşəsi, idman zalı, təlim şəhərciyi lazımi avadanlıq və vasitələrlə təmin olunub.
Azərbaycanın ən yüksək dağ zirvəsi olan Bazardüzü istiqamətində yerləşən sərhəd zastavasının xidməti ərazisi mürəkkəb relyefə və soyuq iqlim şəraitinə malikdir. Dövlət sərhədlərimizin mühafizəsi qış aylarında qalın qarla örtülən dağlıq ərazilərdə, şaxtalı-boranlı havada təşkil edilir. Yeni inşa olunan sərhəd zastavasında yaradılan şərait sərhədçilərə xidməti daha yüksək səviyyədə təşkil etməyə imkan verəcək.
