Son günlərdə cəbhədə vəziyyət yenidən gərginləşib. Müdafiə Nazirliyi bildirib ki, Ermənistan təmas xəttində vəziyyəti məqsədyönlü şəkildə gərginləşdirir. Erməni silahlı bölmələri noyabrın 2-nə keçən gecə cəbhənin şimal-qərb istiqamətində yerləşən bölmələrimizin mövqelərini 60 millimetrlik minaatanlardan, qumbaraatanlardan və iriçaplı pulemyotlardan intensiv atəşə tutub. Сavab tədbirləri nəticəsində düşmən susdurulub.
Hərbi ekspert Yaşar Aydəmirov deyir ki, Ermənistan rəhbərliyi diqqəti ölkə daxilində yaşanan qeyri-sabit vəziyyətdən yayındırmaq üçün cəbhədə gərginlik və ajiotaj yaradır. Onun fikrincə, Ermənistan bu yolla heç nəyə nail ola bilməyəcək. Belə davam edərsə, aprel döyüşləri yenidən təkrarlana bilər: “Onlar bir gərginlik haqqında xalqın beynini doldurmalıdırlar ki, cəbhə xəttində vəziyyət gərgindir, siz burda daxildə çəkişmələr aparmayın. Ona görə də bunlar cəbhədə vəziyyəti gərginləşdirməyə başlayırlar. Şimal-qərb cəbhəsində 60 millimetrlik Aqs tipli silahlardan, iriçaplı pulemyotlardan atəşə tutmağa başladılar. Öz əhalisində sakitlik yaratmaq üçün cəbhədə ajiotaj yaradırlar”.
Politoloq Arzu Nağıyev isə hesab edir ki, Ermənistan cəbhədə vəziyyəti məqsədyönlü gərginləşdirməklə Dağlıq Qarabağ münaqişəsinin sülh yolu ilə həllindən yayınmaq istəyir: “Əsas məqsəd status-kvonu saxlamaq, danışıqlardan yayınmaqdır. Artıq Azərbaycana iriçaplı pulemyotlardan başlayıblar atəş açmağa. Düşünürəm ki, bu yenə də ermənilərin geri çəkilməsi ilə nəticələnəcək. Aprel hadisələrində bir neçə yüksəkliklər Azərbaycan tərəfinə keçib, onlar da bu ərazilərin yenidən bərpa etməyə cəhd edirlər”.
Müdafiə Nazirliyi bəyan edib ki, qoşunların təmas xəttində vəziyyətin məqsədyönlü şəkildə gərginləşdirilməsinə görə bütün məsuliyyət Ermənistanın kriminal hərbi-siyasi rejiminin üzərinə düşür. Azərbaycan hərbçiləri Ermənistan tərəfinin bütün həmlələrinin qarşısını layiqincə almaqda davam edirlər.
