Գնա և հանդիպիր խնդիրներիդ
Սաղմոս 23:4 - «Թէեւ գնամ մահի շուքի ձորումը՝ չար բանից չեմ վախենալ. որովհետեւ դու ինձ հետ ես. քո գաւազանն ու քո ցուպը՝ նորանք մխիթարում են ինձ»։
«Դուրս գալու լավագույն միջոցը միջով անցնելն է». Ռոբերտ Ֆրոստ:
Շատ տարիներ առաջ Մոսկվայում մասնակցում էի մի եկեղեցական ժողովի։ Պատգամի ընթացքում Աստված խոսեց սրտիս հետ հովվի միջոցով։ Նրա խոսքն այս էր. «Մի՛ վախեցիր դժվարություններից, որ ունես քո կյանքում և ամենակարևորը՝ մի՛ փախիր դրանցից, միևնույն է, դրանք գալու են քո ետևից և այս կյանքում ունենալու ես դժվարություններ։ Գնա՛, հանդիպի՛ր այդ խնդիրներին և պատերազմելով՝ հաղթիր դրանց»։
Այս խոսքն ուղեկցում է ինձ իմ կյանքում պատահած դժվարությունների ժամանակ։
Կարծում եմ՝ չի գտնվի գեթ մեկ մարդ, ով կսիրի դժվարություններ, խնդիրներ, փորձություններ այս կյանքում։ Շատերը կուզենային, եթե անգամ իրենց կյանքում ունենան դժվարություններ, որքան հնարավոր է՝ շուտ դուրս գան դրանցից և քիչ կորուստներ ունենան։
Ոմանք էլ փորձում են փախչել իրենց դժվարություններից որքան հնարավոր է հեռու, ինչպես Դավիթը փախավ, երբ նրա որդին՝ Աբիսողոմը, իրեն թագավոր հռչակեց։ Բայց, ի վերջո, նա հասկացավ, որ չի կարող փախչել, որովհետև պետք է լուծի այդ խնդիրը և հաղթի իր արգելքին։
Իրականությունն այն է, որ մենք կունենանք դժվարություններ այս կյանքում, չենք կարող փախչել այդ խնդիրներից, անգամ կունենանք կորուստներ այս կյանքում։
Ոմանք հավատքը շփոթում են «ջայլամային» հասկացողության հետ։ Եթե ունես դժվարություն, մի ընդունիր դա, դավանիր, որ չունես և այդպես չես ունենա։ Բայց դա սուտ է, և ոչ Սուրբ Գրային։
Եթե չկա մի բան, ապա ի՞նչը չընդունես և ինչի՞ մասին հակառակը դավանես։ Երբեմն նմանվում ենք երեխաների, ովքեր փակելով իրենց աչքերը՝ մտածում են, որ իրենք չեն երևում: Թաքցնելով մեր խնդիրները, խոսելով դրանց մասին, որ չկան՝ կարծում ենք դրանք կչքվեն։
Ես հորդորում եմ, որ հեռու մնանք այսպիսի կեցվածքից, այլ հակառակը, մենք ընդունենք, որ ունենք այդ խնդիրը մեր կյանքում, բայց չհանձնվենք և չտրվենք այդ խնդրի ցավին և հետևանքներին, այլ հավատքով մղվենք պայքարի, որպեսզի հաղթենք այդ խնդիրը մեր կյանքում և կանխենք նրա բոլոր բացասական հետևանքները։
մի գուցե Մե՞ղք ունես քո կյանքում, հիվանդությո՞ւն կամ ֆինանսական պարտքե՞ր ունես, խռովությո՞ւն ունես որևէ մեկի հետ, բնավորության վատ գի՞ծ կամ ամուսնանալու խնդի՞ր կա, ամուսնական խնդիրնե՞ր ունես, եկեղեցական դժվարություննե՞ր կան, անձնական հոգևոր կյանքում չե՞ս զգում Աստծո ջերմությունը, չե՞ս կարողանում սրտանց փառաբանել Աստծուն, աշխատանքի մեջ զգում ես անհաջողություննե՞ր, ուսման մեջ ցածր գնահատականնե՞ր կան…
Կարող ենք այս շարքը շատ երկար շարունակել, բայց ես հորդորում եմ քեզ՝ ինքդ շարունակել կոնկրետ բաներ, որոնք այսօր եկել են քո կյանք։ Եվ սկսես աղոթքով պայքարել այդ խնդիրների դեմ: Հանիր Աստծո խոսքից հատվածներ, որոնք վերաբերվում են այդ խնդրին, կամ քեզ զորացնող և առաջ մղող խոսքեր, իմաստությամբ վարվիր՝ ինչպես անես, որ լուծես այդ խնդիրը և վերականգնես կորցրածդ կամ դեմ կանգնես, որպեսզի կորուստներ չունենաս: Եթե զգում ես՝ կարիք կա, խոսիր որևէ իմաստուն և հոգով լցված մեկի հետ և խնդրիր, որ օգնեն քեզ։ Բայց երբեք մի՛ փախիր քո դժվարություններից, գնա՛, հանդիպի՛ր և անցի՛ր դրանց միջով՝ իմանալով, որ Աստված քեզ հետ է այդ ձորով անցնելիս (թե դա ինչի ձոր է քեզ համար՝ հիվանդության, պարտքի, մեղքի…, ինքդ անվանիր)։
Սեդրակին, Միսակին և Աբեթնակովին գցեցին կրակի մեջ, որ սպանեն նրանց, և Տերը նրաց հետ այդ կրակի մեջ էր, նրանք չվախեցան և ետ չդարձան իրենց համոզմունքներից և Աստված հրաշալի կերպով թույլ տվեց, որ իրենք մտնեն այդ խնդրի մեջ, բայց դուրս հանեց նրանց կրակից հրաշալի կերպով։ Քո ազատագրումը ևս պատրաստ է քեզ համար, բայց կարիք ունես անցնել այս ամենի միջով, որ ստանաս այն։
Ա Կորնթացիս 10:13 - «Ձեզ ուրիշ փորձութիւն չէ պատահել բացի մարդկային փորձութիւնից. բայց Աստուած հաւատարիմ է, որ չի թողիլ ձեզ ձեր կարողութիւնիցը վեր փորձուելու, այլ փորձութեան հետ ելքն էլ կպատրաստէ, որ կարողանաք համբերել»։
