Нұрсұлтан Назарбаев бүгін Жоғарғы сот төрағасын қабылдады. Қайрат Мәми Ұлт жоспары шеңберінде сот реформаларын жүзеге асыру жөнінде есеп берді.
Айтуынша, Жоғарғы сот әділдікті қамтамасыз етуге мән беріп отыр. Ағымдағы жылдың алғашқы 5 айында 512 мыңнан астам қылмыстық, азаматтық және әкімшілік іс сотқа келіп түскен. Оның 417 мыңы уақтылы қаралып, заңды шешімін тапты.
Нұрсұлтан Назарбаев, Қазақстан Республикасының Президенті:
- Мәселенің барлығын қойдық. Одан кейін жұмыс істеп жатсыңдар. Ұлттық бағдарлама бар. Оның ішінде құқық қорғаудың, Жоғары соттың да шешілген мәселелері бар. Соның барлығы қалай жүріп жатыр?
Қайрат Мәми, ҚР Жоғарғы сотының төрағасы:
- Жалпы соңғы жылдары құқық саласында өткізіліп жатқан реформалар, енгізілген өзгерістердің барлығы сот жүйесіне де өзінің оң ықпалын тигізіп жатыр. Республика соттары сот әділдігін уақтылы және мезгілінде атқарып жатыр. Соттар тұрақты жағдайда қызмет істеуде. Сот әділдігі толығымен қамтамасыз етіліп жатыр.
Қайрат Мәми азаматтық істер бойынша халықтың сотқа деген сенімі артқанын алға тартты. Осы орайда электрондық сот жүйесі де қалыптасты. Нәтижесінде азматтық істер бойынша талап-арыздың 83%-ы электрондық түрде беріледі. Бұл сот жүйесін жетілдіруде атқарылған істің бір парасы ғана. Президент әлі де істейтін шаруа шаш етектен екенін айтты. Ол жұмыс барлық құқық қорғау органдарын қамтиды. «Басты мақсат – сот үстемдігін қамтамасыз ету», – деді Елбасы.
Нұрсұлтан Назарбаев, Қазақстан Республикасының Президенті:
- Егер де ел сотқа сеніп, сотқа жүгінетін болса, соттың шешімімен әділ шешім алатын болса, олардың құқықтары қорғалатын болса, сонда біз мақсатымызға жеттік деп, заңның үстемдігіне жеттік деп айтуымызға болады. Қазір толықтай олай деп айта алмаймыз. Өйткені полицияның, Қауіпсіздік комитетінің, қаржы полициясының тапқан мәселелері көбінесе солардың айтқан сөзімен, солардың айыптауымен өтіп кете береді. Полицияның да, Қауіпсіздік комитетінің де, қаржы полициясының да істегенінің барлығы дұрыс болып шықпайды ғой. Бізде сотқа жетпей қайтарса, ол жұмыстың орындалмағаны болып сезінеді. Ондай емес! Сондықтан істейтін жұмыстар көп. Қазір менің тапсырмаммен жұмыс істеліп жатқанын білесіз. Жергілікті полиция әлі жұмысын істей алмай жатыр. Мысалы, салық төңірегіндегі тексерулер әлі азайған жоқ. Бизнесті тексеру азайған жоқ. Осының бәрі дұрыс шешілмегендіктен, дұрыс шешім қабылданбағандықтан болады. Әрбір құқық қорғау органын айтып отырмын.
