Ўзбекистон ҳукумати четга кетаётган мигрантлари сонини қисқартирмоқчи.

Спутник хабар агентлигининг ёзишича, 2030 йилгача мамлакат четга ишлаш учун кетадиган меҳнат муҳожирларини 16.6%гача камайтиришни режаламоқда.

Аммо ҳукумат четга иш излаб кетаётганларни қандай қилиб банд қила олади - мавҳум қолмоқда.

Ўзбекистонда ҳар йили меҳнат бозорига 600-800 минг атрофида ёшлар кириб келади.

Уларнинг кўпчилиги олий таълим ололмайди.

Чунки Ўзбекистонда ёшларни олий таълимда қамраб олиш миқёси ҳатто Афғонистондан ҳам паст даражада.

Келаси 10 йилдан кейин эса Ўзбекистон аҳолиси 38 миллиондан ошиши кутилади.

Уларнинг ярмидан кўпи - меҳнат ёшидаги аҳоли.

Ўзбекистон мустақиллик даврида ўз иқтисодини, хусусан, қишлоқ хўжалигини ислоҳ эта олмади.

Иш ўринлари ташкил этиш ёки кичик бизнес учун шароитлар яратиш бобида ҳам мамлакат кўплаб бошқа собиқ Совет давлатларидан орқада қолиб кетди.

Ҳозирда камида 2-3 миллион ўзбекистонлик оила боқиш учун аксар Россия, қисман Қозоғистонда оғир шароитларда ишлашга мажбур бўлишмоқда.

Ўзбекистон бир неча бор мигрантларни назоратга олиш ва чеклашга интилди.

Лекин таҳлилчиларга кўра, агар миллионлаб ишлаш ёшидаги нисбатан малакасиз аҳоли Ўзбекистонга қайтса ва ватанда улар ишсиз қолишса, мамлакатда ижтимоий портлаш юз бериши мумкин.


Айни патйда, жиноятчилик ва қашшоқлик ошиб кетади, мигрантлар пули ҳисобига яшаб келаётган тижоратлар ҳамда пул айланиши ҳам қулайди.

Хўш, Ўзбекистон бу сафар миграцияни қандай жиловламоқчи ва жиловлай оладими?

Айни қарорнинг ижобий ва салбий оқибатлари нима, улар кимга қандай таъсир қилади?

ББС Ўзбек видео лавҳасини томоша қилинг.

свернуть