Алматы облысында жаяу жүргінші жолағымен жолды кесіп өтпек болған 6-сынып оқушысын көлік қағып, жасөспірім сол жерде көз жұмды. Осы қайғылы оқиғадан кейін жолға қауіпсіздік құралдарын орнатуды талап еткен ауыл азаматтары түнделетіп тас жолды жауып, наразылық білдірді. Ал болған жайттан бойларын үрей билеген Жаңалық ауылының тұрғындары бүгін балаларын мектепке жіберуден бас тартқан. Елдімекенді қақ жарып өтетін облыстық маңызы бар жолда жаяу жүргіншілерге арналған жолақ пен белгі болса да, жүргізушілердің көбі бұған мән бермейді дейді тұрғындар. Күн сайын балаларын оқуға жіберіп, жанын шүберекке түйіп отыратын ата-аналар жолға Сергек камералары мен бағдаршам орнатуды талап етіп отыр.
Талғар ауданы Жаңалық ауылындағы бұл жолда бірнеше адамды көлік қағып, мерт болған. Соның бірі кеше кешкі уақытта жаяу жүргінші жолағынан өтпек болған 10 жастағы оқушыны көлік қағып, бала алған жарақатынан көз жұмды. Куәгерлердің айтуынша, жеңіл көлік алдында тоқтап тұрған автобусты елемей, қарама-қарсы бағытқа шығып кеткен. Осылайша, «ертең туған күнім» деп жүрген жасөспірімді қаққан.
ЖЕҢІС АЙТМҰРАТОВ, Жаңалық ауылының тұрғыны:
– Менің қарындасыммен бірге келе жатқан. Қарындасым дүкенге кіріп кетеді, ал бала жаяу жүргінші жолағымен өтіп бара жатқанда автобус тоқтайды, автобустан кейін үшінші көлік жолаққа шығып, 140-160-пен келіп соғады. 30-40 метр жерге ұшырып тастаған баланы. Соққан жігіт жоқ, көлігін тастап, қашып кеткен.
Қашқан жігіт ұсталған. Облыстық полиция департаменті дерегінше, Toyota Camry тізгендеген 24 жастағы азамат 5 жылға дейін бас бостандығынан айырылуы мүмкін. Уақытша ұстау изоляторына қамалған жігіт өз кінәсін мойындап отыр.
КҮДІКТІ:
– На пешеходе я не заметил как мальчик выбежал, случайно сбил. Очень жалею. Жақын туыстарынан кешірім сұраймын.
10 мың адам тұратын ауылдағы қайғылы оқиғаны көріп-білген ата-аналар балаларын мектепке жіберуге қорқып қалған. Себебі ауылдағы бір ғана мектепке бару үшін жолдың қарсы бетінде тұратын оқушылар көлік зулаған тас жолды кесіп өтуге мәжбүр. Жолдың бірнеше жерінен жаяуға арнап жолақ салғанымен одан еш пайда болмапты.
Ал 400 оқушыға арналған ауылдағы жалғыз мектепте қазір 1800-дей бала 3 ауысыммен оқиды. «Жаңалықтың шығысынан тағы бір мектеп салынсын» деген ата-аналардың шағымымен мұғалімдер де келісіп отыр. Білім ордаларындағы жыл соңына дейін жаңа мектептің құжаттары дайын болады дейді.
ДИНА ЖАЙСАҢБАЕВА, Жаңалық ауылы мектебінің мұғалімі:
– Биыл қараша айында мектептің сметалық құжаты бітті мектептің, сараптамаға берілді. 2023 жылдың қаңтарынан бастап мектеп салуға ақша сұралады.
Алматы облыстық білім басқармасы өкілдері де бұл ақпаратты растап отыр. Үш ауысымдық білім ұяларын жою бағдарламасы аясында мектеп салуға жер телімі де белгіленіп қойған. Келесі жылы жаңа оқу ордасы салынбақ.
Азамат Қабетов, Владислав Шишко
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
