Қазақстанның сот-сараптамалық қызметінде кемшіліктер көп.
Оларды Әділет министрі Марат Бекетаев Мәжілісте өткен Үкімет сағатында тізіп берді. Сараптама қорытындысы ұзақ жасалатыны, сапасының төмендігі мен саладағы сыбайлас жемқорлық жағдайды одан сайын ушықтыра түседі. Министр елдегі сот-сараптамалық қызметтің мұндай күйге түсуінің бірнеше себебін атады. Соның негізгісі – жалақының төмендігі. «Кәсіби кадрлар саладан кетіп, біліксіздер білгенін істеп отыр», – дейді Марат Бекетаев. Алдағы уақытта сот-медициналық сарапшылардың еңбекақысын төлеуде жаңа тәртіп енгізілмек. Жалпы министрлік сот сараптама қызметінің моделін тұтастай өзгертпек. Оған сәйкес елде сараптама қызметіне тапсырыс беру мен оған төлем жасау жүйесі де өзгермек.
Марат Бекетаев, ҚР Әділет министрі:
– Сараптаманы бір орган тапсырса, ал оның төлемін басқасы іске асырады. Соттар мен құқық қорғау органдары кейде керексіз сараптамаларды тағайындайды, сонымен қатар аяқталған зерттеулер түрлі себептермен сұрауы жоқ күйінде қалады. Осы орайда біз кезең-кезеңмен тиісті тетікті енгізіп, бұл бағытта соттар мен тергеушілер жүргізілетін сараптамалардың құнын ескеретін болады. Бұл қадамдар бюджет қаржысын ұқыпты пайдалануға және шамадан тыс сараптама санын қысқартуға мүмкіндік береді.
Балаим Кесебаева, ҚР Парламенті Мәжілісінің депутаты:
– Қазіргі таңда біздің елдің 92 аудан орталығында сот-медициналық сарапшы жоқ. Құқық қорғау органдарына осы мәселені шешу үшін, сараптама жүргізу үшін басқа аудан, облыс орталықтарына жол жүрулері қажет. Ал бұған бюджеттік шығындар жүріп жатқаны туралы айтылды.
