Салқар Сарыарқа төрінен Қаз дауысты Қазыбек би елінен Елбасы мақаласын қолдап, арнайы автокеруен жолға шыққан болатын. Сол топ Егіндібұлақтан киелі Түркістанға жетті. Ұлт ұясы Ұлытау аймағын көктей өтіп, Сыр өңіріне ат шалдырған делегация мүшелерін көне шаһар жұрты Қожа Ахмет Ясауи кесенесі алдында ерекше сән-салтанатпен қарсы алды
«Өсер ел тарихын таспен, өшер ел жаспен жазады» деген. Арнайы делегация бұл сапар арқылы қазақ өткенінің бағасын, бүгінгі шамасын білуге талпынды. Елбасы мақаласындағы ұлттық кодты ұлықтап, оны жас ұрпақтың жадына сақтауға мүдделілік танытты.
Әліпбек ӨСЕРБАЕВ – Түркістан қаласының әкімі
Ер түріктің бесігі саналатын киелі ордаға, қазақ халқының ұлы үш биінің бірі Қаз дауысты Қазыбек би жолымен бабаларға тағзым ниетіндегі жасаған қадамдарыңыз құтты болсын! Елбасымыздың «Рухани жаңғыру» бағдарламасы ұлы тұлғалармыздың есімдерін, жалпы тарихымызды, мәдениетіміз бен ұлттық құндылықтарымызды жаңғыртуға кең жол ашып отыр. Осы бастаманы ұран етіп, іс жүзінде орындауға атсалысып жатқан игі қадамдарыңыз баршамызға ортақ міндет деп есептеймін.
Түркістан – түркі жұртының тұрағы, бар қазақтың Тұраны. Көне шаһар түркі мемлекеттерінің мәдени астанасы атанған жылы құт мекенге келгендерін арнайы делегация бақытқа балады. Қарағанды облысы әкімінің кеңесшісі Рымбала Омарбекова оңтүстік жұртына арқа жұртының ыстық сәлемін жолдап, риясыз ризашылығын білдірді. Қаз дауысты Қазыбек бидің 350 жылдығын тойлауда көне шаһардың рөлі орасан екенін айтты. Жеті автокөлікпен межелі жерге жеткен делегация құрамында 28 азамат бар. Бұл сапты Рымбала Омарбековадан бөлек, даңқты спортшы Серік Сәпиев, ҚР Дін істері және азаматтық қоғам министрлігі жастар саясаты департаментінің директоры Ғабидолла Оспанқұлов пен Қарағанды билігінің белгілі өкілдері толықтырады. Қазақ тарихын кеңінен дәріптеуге мүдделі топ сапар аясында қазақтың ұлы биі жүріп өткен жолмен көрші ел Өзбекстанға, көрші аймақ Тараз топырағына да аялдайды. «Ұлы дала үні» деп, тілек кітабын арнап, оны Қарағанды облыстық өлкетану мұражайына табыс етеді.
Асылбек ТОЙБЕК
