Bakıda iki gün ərzində qaçqın və məcburi köçkünlərin hüquqlarının müdafiəsi sahəsində mövcud vəziyyət müzakirə olunacaq, onlara müxtəlif sferalarda dövlət dəstəyinin verilməsi ilə bağlı təcrübə mübadiləsi aparılacaq. Avropa İttifaqının TAIEX proqramı çərçivəsində “Qaçqınların hüquqlarının müdafiəsi” mövzusunda beynəlxalq seminar keçirilir.
Seminarın məqsədi məcburi köçkünlərin və qaçqınların hüquq və azadlıqlarının müdafiəsi sahəsində mövcud durumu təhlil etməkdir.
Latviyanın Miqrasiya və Vətəndaşlıq Məsələləri Üzrə Xidmətinin Departament Rəhbəri İLONA SELMANİDZE: « Biz ilk olaraq burada Avropa İttifaqında qaçqın statusu və alternativ statusun alınması proseduru ilə bağlı diskussiya aparacağıq. İkinci önəmli məsələ isə prosedurların aparılmasında qaçqınlara yardımla əlaqədardır. Daha sonra qaçqınlarla bağlı dövlətlər üçün vacib olan standartlar haqqında danışacağıq. Yəni, qaçqınlar üçün yaşayış yerləri, tibbi yardım və digər standartlardan söz açılacaq”.
Avropa İttifaqı miqrasiya ilə bağlı balanslı siyasət yürütməyə çalışır. 2016-cı ildə qaçqınların və uşaq miqrantların hüquqlarının müdafiəsinə, onların insan alverindən qorunması istiqamətinə 1 milyard dollar vəsait ayrılıb. Avropa İttifaqı insan alverinin qarşısının alınması üçün ciddi işlər görür.
