Елімізде нан бағасы келер жылдың қыркүйегіне дейін өспейді. Бұл мәлімдемені бүгін ауыл шаруашылығы министрі Асылжан Мамытбеков жасады. Министр мемлекеттік комиссияның осы шешімін парламент мәжілісінде хабарлады. Ол бағаны тұрақты ұстап тұру үшін арнайы субсидия бөлінетінін де тілге тиек етті. Ал қаламызда қыркүйекте ғана әлеуметтік нан бағасы 5 теңгеге қымбаттаған болатын. Өңірдегі қуаңшылық пен қымбатшылық кәсіпкерлерді тығырыққа тіреп, бағаны өсіруге негіз болды. Ауыл шаруашылығы министрі Асылжан Мамытбековтің айтуынша бағаны шарықтатпау үшін мемлекет ұн мен нан шығарушыларға субсидия береді. Қазір нан бағасы дүкендерде әртүрлі. Әлеуметтік нанның бір бөлкесі "Рамазан" дүкендерінде 49 теңге болса, ұсақ сауда орындарында 70 теңгеге дейін жетті. Ауыл шаруашылығы министрі Асылжан Мамытбековтың бағаны тұрақтандыру туралы мәлімдемесі халық арасына әлі кең тарамаса да олар қазіргі құнның көтерілмегенін қалайды. Келісім орындалса, бірінші сұрыпты ұн мен нан бағасы енді 2015 жылдың қыркүйегіне дейін қымбаттамайды. Қазір үкімет бағаны күрт шарықтатпау туралы меморандумды 2015 жылдың қазан айына дейін ұзартуды қарастырып жатыр.
