Вясельная песня, якую спяваюць калі ў нявесты расплятаюць касу і апранаюць яе перад прыездам маладога

Зап. у 1962 годзе ў вёсцы Коўчыцы-2 Светлагорскага раёна Гомельскай вобласці ад У. А. Станкевіч, 1922 г.н. і П.І. Казаковай, 1928 г.н.

===========
Ой, што гэта,
Ой, што гэта ды за зарыва,
Што з вечара загарэлася?

Што з вечара,
Што з вечара загарэлася,
Тудой Галя хадзіла.

Тудой Галя,
Тудой Галя хадзіла,
Тое зарыва тушыла.

Тудой Галя,
Тудой Галя хадзіла,
Сваіх дружачак будзіла:

- Уставайце,
Уставайце, мае дружачкі,
Расчашыце мае косанькі.

Расчашыце,
Расчашыце мае косанькі,
Разаліце мае слёзанькі.

Ужэ ж мая,
Ужэ ж мая ды вайна едзе,
Яна ж мяне ды разваюе.

Наперадзе,
Наперадзе ды ваеннічак,
Ой, ён мяне ды адваюе.

Ой, ён мяне,
Ой, ён мяне ды адваюе,
Ў маёй мамачкі ўваруе!
==========

ЧАС СЬПЯВАЦЬ

Тэлеграм [ Ссылка ]

Інстаграм [ Ссылка ]=

Тік ток @chas_spiavac [ Ссылка ]

свернуть