Америка Құрама Штаттарының Нью-Джерси штатында қалың қар салдарынан төтенше жағдай жарияланды. Штат губернаторы, сондай-ақ, ең қажетті мемлекеттік мекемелерден басқаның бәрін уақытша жабуды ұйғарған. Қаһарына мінген қыс ел астанасы Вашингтонға да қауіп төндіріп тұр. Сол себепті де жалпы Колумбия округіндегі мектеп, балабақша, АҚШ Конгресі сияқты мекемелер уақытша жұмысын тоқтатпақ. Жергілікті ақпарат құралдарының хабарлауынша, елдің орталық және шығыс бөлігіндегі штаттарда қалың қар жексенбіден бері жауып жатыр. Қолайсыздық тудырған ауа райының кесірінен 1 мың 600 әуе рейсі кейінге шегерілсе, тағы сонша ұшақ межеленген уақытынан кешігіп қонған.
