كنت أظن أني على الصده قويت
لين شفته ، شفت روحي تتبعه
والله أني عن غرامه ماسليت
وذود حبه باقيه في مرتعه
امتلى قلبي بحبه وارتويت
وحب غيره ماقدرت أتصنعه
في غيابه كم لدروبه عنيت
كم تمنيت اللقا يصدف معه
ماهنالي زادي وطيب المبيت
والليالي دون شوفه موجعه
لي حبيبٍ غير زوله ما هويت
روحي تحيابه وقلبي منبعه
في خيالي غير زوله ما رأيت
به جمال الكون ربي جمعه
لو جبرنا الصمت بعيونه قريت
وان حكى كل الجوارح تسمعه
ان تباعدنا تراني ما حييت
أشهد انه نبض قلبي قطّعه
كم تناسيت الوداد ولا نسيت
تايه بدونه وضاقت بي السعه
