Отандық фармацевтикадағы мемлекеттік сатып алу жүйесі әлі дұрыс ретке келтірілмеген. Тендер жеңімпазы болып, дәрі-дәрмекпен үздіксіз қамтуды мойнына алған кей компаниялар өз міндеттерін дұрыс орындамайды. Оған айқын дәлел Шығыс Қазақстан облысында.
Жыл басталғалы 4 ай өтті. Биылғы тендер әлі өтпеген. Ал оңтүстікте диспансерлік есепте тұрған науқастарға тегін берілуі тиіс дәрі-дәрмектердің саудаға түскені әшкере болды.
Бір жылдан асты шығыста дәрігерлердің арнайы нұсқамасымен тегін берілетін дәрілерді алу мұңға айналды.
Ұлжан Сәрсенбаева, ҚР ДСМ Фармация комитетінің ШҚО бойынша департамент басшысы:
-Телефонымызға күніне бірнеше қоңырау келіп түседі. Неге дәрілік заттар берілмейтіндігін, себебін сұрайды. Облыста тендер болды. Бір қатысушы шығып қалуына байланысты сот жүріп жатыр.
Екі тарап соттасып жүргенде диспансерлік есептегі 250 мыңнан астам науқас дәрісіз отыр. Бұйрық бойынша жергілікті жерден 36, ал республикалық бюджеттен 13 түрлі ауруға дәрі-дәрмекке жыл сайын қыруар қаржы бөлінеді. Тек Шығыс Қазақстан облысына былтыр 6,5 миллиард теңгеден астам, биыл 7 миллиард 600 миллион теңге бөлінген.
Ал Арқада дәрі бар, қаржы тапшы. Әсіресе жүрек-қан тамырлары және қант диабеті ауруларына. Оны сатып алуға биыл жергілікті қазынадан 4 миллиард теңге қаржы бөлінген. Аздық еткендіктен, тағы 800 миллион теңге қаралмақ. Дәрі-дәрмек қолжетімді болуы үшін өңірде 37 әлеуметтік дәріхана ашылған. 2 мыңға жуық препарат ең төменгі бағамен сатылады.
Альмира Рақымжанова, облыстық денсаулық сақтау басқармасының бөлім басшысы:
-Әлеуметтік дәріханаларда тұрғындар препараттарды көтерме бағамен ала алады. Мұнда дәрінің өзіндік құнына тек 5 пайыз ғана үстеме қосылады. Ал өзге дәріханаларда ол 20-25 пайызға қымбат.
Оңтүстікте науқастарға тегін берілетін дәрілік препараттар саудаға түскен. Жекеменшік дәріханадан дәрі сатып алған бір тұрғын оның сапасына шағымданған. Бақылаушы сала мамандары тексере келе біраз заңсыздықтың беті ашылды. Әкімшілік айыппұл салынып, дәріхана уақытша жабылды.
