Бүгін – Халықаралық әйелдер күні. Біз үшін бұл мерекенің орны ерек, жөні бөлек. Өйткені анасын ардақтаған, қызын қашанда қадірлей білген ұлттың ұрпағымыз.
Бұл күндері ел ішінде өтіп жатқан мерекелік жиын-шаралар өте көп. Біз солардың арасынан ерекше дегендерін екшеп алдық. Бүгінгі шығарылым тұтастай-дерлік әйелдер қауымы жайлы болады. Мақсатымыз – аруларымыздың қоғамдағы ойып тұрып алатын орнын көрсету.
Алғашқы кейіпкеріміз Атырау теміржол дистансасының жол жөндеушісі – Гүлжиян Өтешова. 30 жылдан астам теміржол саласының ыстық-суығына төзіп келе жатқан ана биыл 55-ке аяқ басқалы отыр.
Мерекеге орай біздің түсіру тобымыз азамат жүгін арқалаған әйелді құттықтау үшін алыс бекетке арнайы барып қайтты.
Теміржол өмір жол деген, күре жолда пойыз қозғалысында кідіріс жоқ. Оны қас қақпай бақылайтын, оқыс оқиға орын ала қалса, уақытылы қалпына келтіретін жол жөндеушілердің бірі – Гүлжиян Өтешова.
Гүлжиянның бригадасы қазір бұрылыстағы теміржол табанын ауыстыру үстінде. Жыл маусымымен санаспайтын ынтымақты ұжым бүгін араларындағы жалғыз нәзік жанды төл мерекесімен жұмыс басында құттықтады.
