CBC xəbər verir ki, Olimpiya Oyunlarında iştirak etmiş idmançılar və onların məşqçiləri ilə görüşdə Prezident, Milli Olimpiya Komitəsinin prezidenti İlham Əliyev belə deyib.
Dövlət başçısı qeyd edib ki, bu qələbə bir daha Azərbaycanın idman dövləti olduğunu göstərdi:
“Bu, doğrudan da tarixi qələbədir. Azərbaycan idmançıları Rio Olimpiya Oyunlarında 18 medal qazanmışlar. Bu, rekord göstəricidir. Onlardan 1-i qızıl, 7-si gümüş, 10-u isə bürünc medaldır. Bu, onu göstərir ki, Azərbaycan doğrudan da idman dövlətidir. Mən bunu dəfələrlə bildirmişəm. Bir daha demək istəyirəm, həyat və idmançılarımızın nəticələri bunu bir daha təsdiqləyir. Medalların sayına görə Azərbaycan komandası 14-15-ci yerləri bölüşür. Avropa ölkələri arasında 7-ci, keçmiş Sovet İttifaqı respublikaları arasında 2-ci, müsəlman ölkələri arasında isə 1-ci yerdədir. Bu möhtəşəm qələbə bütün Azərbaycan xalqını sevindirir. Azərbaycan xalqı öz idmançıları ilə fəxr edir və mən sizi bu gözəl qələbə münasibətilə bir daha ürəkdən təbrik edirəm”.
Prezident İlham Əliyev qeyd edib ki, bu gözəl nəticələrə nail ola bilmək üçün məqsədyönlü şəkildə idman siyasəti aparılır. Hər Olimpiadada Azərbaycanın nəticələrinin artması böyük uğurdur. Çünki Yay Olimpiya Oyunlarında dünyanın ən qabaqcıl idmançıları iştirak edirlər və orada medal qazanmaq o qədər də asan deyil. Bu dəfə 18 medal əldə etməyimiz onu göstərir ki, son 4 ildə də Azərbaycan idmanı sürətlə inkişaf edib:
“Biz güclü idman dövlətləri arasındayıq. Biz bütün dünyaya göstəririk ki, Azərbaycanda idman inkişaf edir, gözəl gənc nəsil yetişir və idman hər bir ölkənin ümumi inkişafının təzahürüdür” – deyən dövlət başçısı qeyd edib ki, uğurlu iqtisadi inkişaf və düşünülmüş siyasət Azərbaycanı dünya idman elitasının sıralarına daxil edib.
“Biz bütün reytinqlərə görə qabaqcıl yerlərdəyik. Yay Olimpiya Oyunlarından sonra bir neçə parametr üzrə təhlil aparılıb - ölkələrin əhalisinin sayına görə medalların sayı və ölkələrin ümumi daxili məhsulunun həcminə görə medalların sayı. Hər iki reytinqdə biz birinci onluqdayıq. İştirak edən idmançıların medallarının sayına görə isə biz birinci yerdəyik. Biz Olimpiadada 56 idmançı ilə təmsil olunmuşuq, 18 medal qazanmışıq. Yəni, bu meyar üzrə biz dünyada birinciyik” – deyən president İlham Əliyev bu qələbəni müstəqilliyimizin 25 illiyinə gözəl həddiyyə adlandırıb:
“Siz Azərbaycan xalqını sevindirmisiniz. Rioda müstəqil Azərbaycan bayrağı 18 dəfə dalğalanıb. Xüsusilə nəzərə alsaq ki, bir aydan sonra biz müstəqilliyimizin bərpasının 25 illiyini qeyd edəcəyik, bu, müstəqilliyimizin 25 illiyinə Azərbaycan idmançıları tərəfindən gözəl hədiyyədir. Bütün Azərbaycan xalqı sizinlə fəxr edir. Mən sizinlə fəxr edirəm. Sizə minnətdaram, sizə uğurlar arzulayıram, sizi öpürəm, bağrıma basıram! Eşq olsun Azərbaycan idmançılarına!” – deyə, dövlət başçısı bildirib.
Sonra Prezident İlham Əliyev Azərbaycan idmanının inkişafındakı xidmətlərinə və 31-ci Yay Olimpiya Oyunlarında göstərdikləri yüksək nailiyyətlərə görə təltif edilmiş idmançılar və onların məşqçilərinə “Azərbaycan Respublikası Prezidentinin fəxri diplomu”nu, “Tərəqqi” medallarını, “Şöhrət”, “Vətənə xidmətə görə” ordenlərini təqdim edib.
