1-ші топтағы мүгедек алдағы 11 жылын қатаң тәртіптегі колонияда өтейді. 2006-шы жылы көлік апатына ұшыраған егде жастағы ер адам 1-топтағы мүгедек. Қол арбаға таңылған. Былтыр маусым айында есірткі өткізгені үшін ұсталғанда №2 қалалық сот денсаулық жағдайын ескеріп, оған 3 жыл шартты мерзім тағайындаған болатын. Алайда қылмыскер есірткі бизнесін тоқтатпаған. Соңғы рет ол былтыр 4-желтоқсанда 1,5 келі марихуана өткізу кезінде ұсталды. Облыстық қылмыстық істер жөніндегі мамандандырылған ауданаралық сотында судья Мәдина Сисенова бүгін №2 қалалық соттың шешімін жойып, қатаң жаза тағайындады. Жазаны өтеу мерзімі қылмыскер қамауда отырған 2015-ші жылдың 4-ші желтоқсанынан бастап есептеледі. Сотталушы Есіркепов Қызылорда облысы Қазалы ауданының тумасы. Екі ортада есірткі заттарын көлікпен тасыған. Мүгедек әкелерінің жүріп-тұруына, қала арасына қатынауына ұлдары көмектескен. Қазір №2 қалалық сот бір ұлына қатысты істі қарап жатыр. Ал Есіркеповтің өзі судьяға 1991-ші жылдан бері есірткі тұтынамын деген. Есірткі заттарын да өзінің пайдалануы үшін сатып алып, сақтап келгеніне сендірмек болған. Сондай-ақ ол бұрын да ұрлық жасағаны үшін бірнеше мәрте түрмеде жазасын өтеген.
