Муҳиддин Кабирӣ , узви кумитаи равобити байналмилалии Маҷлиси намояндагони Тоҷикистон рӯзи 26 феврал ба Радиои Озодӣ гуфт, ки ҳарчанд Владимир Жириновский бо сӯҳбатҳои эҳсосотияш маъруф аст, аммо вай ҳамчун роҳбари як ҷиноҳи Думаи давлатӣ назари қишре аз аҳолии Русияро баён мекунад: «Жириновский як дафъа аз Путин ҳушдор низ гирифта буд, ки чунин ҳарфҳоро назанад, аммо вай боз идома медиҳад. Чунин эҳсос мешавад, ки Жириновский бо розигии қаблии бархе аз сиёсатмадорони Русияр ин ҳарфҳоро мезанад. Вагарна пеши роҳи ӯро гирифтан чандон душвор нест.»
Исмоил Талбаков, вакили порлумон аз ҳизби комунисти Тоҷикикистон мегӯяд, суханҳои Жириновскийро бояд ҷиддӣ гирифт, чунки он аз тариқи шабакаи телевизионии давлатии «Россия-24» пахш шуд: «Ин суханони ӯ шовиностона аст, ки истиқлолияти милли кишварҳои соҳибистиқлолро нодида мегирад. Ҳол он ки ин истиқлолияти кишварҳои Осиёи Миёна дар натиҷаи муборизаҳо ба даст омдааст. Ин суханони ӯ авзои амни кишварро метавонад ноором кунад, ки мо онро маҳкум мекунем. Мо ҷонибдори муносиботи хуб бо кишвари Русия ҳастем, муносиботе ки ба манфиати ҳарду кишвар бошад.»
[ Ссылка ]
