Գնահատելով շարունակիր ապրել

Փիլիպ. 4.11 - «...վասնզի ես սովորեցի ինչի մէջ որ կամ, նորանով բաւական լինել»։

Փիլիպ. 3.13 - «Եղբարք, ես իմ անձը չեմ համարում որ հասած լինեմ, բայց մէկ բան կայ, ետեւի բաները մոռանալով, դէպի առաջի լինողներն եմ նկրտում»։

Շնորհակալ եղիր նրա համար, թե ով ես դու այս պահին։ Շարունակիր պայքարել այն ամենի համար, որ դու ուզում ես լինել վաղը։

Մեկ օր փողոցում մի ծանոթ մարդու հարցրի՝ «Ո՞նց ես», և հետո իմ հարց տալուց փոշմանեցի 😊 Հարյուրից ավել դժգոհություն, բողոք, տրտունջ, անհուսության տանող խոսքեր, անպատվաբեր խոսքեր և ոչ մի գոհություն, շնորհակալություն, գովասանք, պատվաբեր և հույս արթնացնող խոսք։ Արդեն որոշ վերապահումներով եմ վերաբերվում մարդկանց հարցնելուն, թե ինչպես են 😊

Իրականում մենք ապրում ենք մի երկրում, որտեղ, շատ բաներ, մեղմ ասած, այնքան էլ լավ չեն, և դժվար է ապրել՝ սոցիալ-տնտեսական դժվարություններից ելնելով։ Սրա մասին գիտենք բոլորս, և սա նորություն չէ մեզ համար։

Բայց մի՞թե մենք էլ պիտի նմանվենք աշխարհիկ (հեթանոսներին) մարդկանց և մի՞թե մեզ էլ պիտի հետաքրքրի միայն նյութականը և սոցիալական հարցերը, չէ՞ որ Աստված շատ ավելին ունի մեզ համար։ Անգամ այս դժվարին իրավիճակներում Տերն ուզում է, որ մենք տեսնենք, թե ինչ ունենք և ուր ենք հասել մեր կյանքում, գոհանանք այդ ամեն ունեցածի և եղածի համար, չէ՞ որ այդ ամենին էլ կարող էինք չհասնել և չունենալ, բայց այսօր կանք և ունենք։

Պետք է սովորենք
1. Մեր եղած վիճակը և ունեցածը նկատել,
2. Գնահատել և ուրախանալ դրանցով,
3. Գոհություն հայտնել Աստծուն այդ ամենի համար,
4. Գոհանալ այսօրվա համար, բայց վաղվա համար միայն դրանով չբավարարվել,
5. Շարունակել ունենալ ավելի շատ և մեծ նպատակներ՝ ապագայում հասնելու համար,
6. Պայքարել և աշխատել ավելին լինել և ունենալ ապագայում։

Կարծում եմ՝ սա է լավագույն կերպը այսօր ապրելու, և ավելին՝ սա հենց Ինքը՝ Աստված է ուզում, որ այսպես լինենք և ապրենք։ Այնքան օրհնություններ է Աստված տվել մեզ, որ շատ ժամանակ մենք մտածում ենք, թե դրանք պետք է լինեին։ Բայց ոչ, այդ ամենը կարող էին և չլինել, սակայն Տերը տվեց, օգնեց մեզ՝ լինենք այն, ինչ կանք այսօր, չարժե՞ արդյոք հաճախակի կանգ առնել ու տեսնել այն ամենը, որ արդեն ունենք և ուրախանալ դրանցով։

Շատերն էլ կանգնում են և մնում այդտեղ կանգնած, բայց ոչ, ապագայում էլ դեռ շատ մեծ բաներ են մեզ սպասվում, շարժվիր, գնա առաջ և կկարողանաս ապագայում քեզ եղած օրհնությունն էլ տեսնել ու վերցնել։ Շատերը ապագայի՝ իրենց պատկերացրած լավ բաները կապում են ինչ որ բաների հետ։ Մեկը կապում է մեծանալու, մյուսը՝ ավելի շատ գումարի, մեկն էլ՝ այլ երկիր տեղափոխվելու հետ, և այսպես, իրենք իրենց խաբելով, վատնում են տարիները՝ այդպես էլ առաջ չընթանալով և չվերցնելով այն ամենը, որ Աստված պատրաստել էր իրենց համար։

Սիրելի՛ հոգի, այսօր է պետք ուրախ լինել, այլ ոչ թե ուրախությունը կապել ապագայում սպասվող որևէ իրավիճակի հետ:
Եթե նկատում և գնահատում ես այն ամենը, ինչ այսօր ունես, ապա դու կկարողանաս նաև ապագայում ավելացնել քո եղածն ու ունեցածը։

свернуть