Ruhunuz önündə baş əyirik biz,
Bu anı borcluyuq sizə, şəhidlər.
Tam etdiz vətəni canınızla siz,
Yaşatdız sevinci bizə, şəhidlər.

Nə az, nə çox, tam iki il keçibdir,
Torpaqlar alınıb, hər şey bitibdir.
Bütün Azərbaycan rəhmət deyibdir,
Allah rəhmət etsin sizə, şəhidlər.

Şükürlər o günə, həm də bu günə,
Sizlər sayəsində döndük vətənə.
Nə desək az olar inanın yenə,
Layiqsiz ən gözəl sözə, şəhidlər

Ömrün baharında gülləri soldu,
Bütün sevənlərin gözləri doldu.
Bu payız onlara son fəsil oldu,
Çıxmadı bu güzdən güzə şəhidlər.

Bu xalqın könlündə bir iz saldılar,
Yandırdı qəlbini, bir köz saldılar.
Yaddan çıxmayacaq bir "öz" saldılar,
Uzanır ən dərin "öz"ə şəhidlər.

Dünyanı heyrətdə qoydular tamam,
Bu xalqda yaratdı sonsuz bir inam.
Keçdilər keçilməz neçə sınaqdan,
Sonuçda çıxdılar üzə şəhidlər

"Vur əmri" verdilər vurdu, dağıtdı,
Özünü daima irəli atdı.
Düşmən qorxusundan silahın atdı,
Gətirdi dqşməni dizə şəhidlər.

Çiynində daşıdı əsgər yoldaşın,
Qoymadı yarıda öz silahdaşın.
Aldılar vətənin hər bir qarışın,
Qana-qan, dişə-diş, gözə şəhidlər.

Bizləri çıxardı aydın sabaha
Özləri qovuşdu uca Allaha.
Cismani getdilər dönməzlər daha,
Ailəniz çətin ki, dözə, şəhidlər.

Ailəsi onları hər an anacaq,
Adları dillərə dastan olacaq
Bu millət heç zaman unutmayacaq,
Sanki dünən olub təzə şəhidlər.

Şəhidlər ölməyir, diridir onlar,
Cənnət əhlindəndir, biridir, onlar.
Bizim aramızda gəzişir, onlar,
Ancaq görsənməyir gözə şəhidlər.

Həyatın qanunu - hamı öləcək,
Axirət yurduna səfər edəcək.
Quranda ayə var - cənnət görəcək,
Allah vəd eləyib sizə, şəhidlər
Kaş ki, qismət ola bizə, şəhidlər.  18.09.2022

свернуть