Şəhid Ziya Nurməmmədov 2001-cü ildə Kürdəmirin Sığırlı kəndində anadan olub. Ziya orta məktəbi bitirdikdən sonra həqiqi hərbi xidmətə yollanıb. Ailənin tək oğul övladı olan Ziya kəndin ən gənc şəhididir. Vətən müharibəsi başlayanda o, 3 ay idi ki, müddətli həqiqi hərbi xidmətə çağırılmışdı. Ziya Nurməmmədov cəbhənin Füzuli istiqamətindən döyüşə başlayıb, düşmənin xeyli sayda canlı qüvvəsi və texnikasının məhv edilməsində əvəzsiz xidmətlər göstərib. Oktyabr ayının 13-də elə orada da qəhrəmancasına vuruşaraq şəhidlik zirvəsinə ucalıb.
Şəhid Ziya Nurməmmədov ölümündən sonra "Vətən uğrunda" “Cəsur döyüşçü” və “Füzulinin azad olunmasına görə” medalları ilə təltif edilib.
Azərbaycan Ordusunun əsgəri Tarverdiyev Feyruz İslam oğlu 22 iyul 1996-ci ildə Kürdəmir rayonunun Sığırlı kəndində dünyaya göz açıb.
O, noyabrın 3-də Xocavənd rayonunda gedən döyüşdə alıdığı qəlpə yarası nəticəsində şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Feyruz Tarverdiyev ölümündən sonra "Vətən uğrunda" medalı ilə təltif edilib.
Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Feyruz Tarverdiyev ölümündən sonra "Xocavəndin azad olunmasına görə" medalı ilə təltif edilib.
Mənsur Ağa oğlu Ağayev 1994-ci il, iyunun 29-da Hacıqabul rayonunun Padar qəsəbəsində anadan olub. Mənsur Ağayev 2020-ci ildən Azərbaycan Silahlı Qüvvələrinin "N" saylı hərbi hissəsində müddətli həqiqi hərbi xidmətdə idi.
Azərbaycan Ordusunun əsgəri olan Mənsur Ağayev 2020-ci il sentyabrın 27-də başlanan Vətən müharibəsində vuruşub. Hərbi xidmətini başa vurub geri dönən Mənsurun arzuladığı gün gəlib. 27 sentyabr 2020-ci ildə erməni işğalı altındakı torpaqlarımızı azad etmək üçün Ali Baş Komandan əks-hücum əmri verib.
Mənsur Ağayev bu dəfə könüllü döyüşə getməyi qərara alıb. Evdə heç kim onun istəyinə qarşı çıxmayıb, anası yola salanda dözə bilməyib, ağlayıb. Mənsur ağlayan anasına gülə-gülə bu sözləri deyib: "Ana, mən şəhid olacağam, mənim adımla fəxr edərsən həmişə".
Onu tanıyanların dediyinə görə, Mənsur çox xeyirxah, yardımsevər, hər kəsin köməyinə yetən biri olub. Qarabağ uğrunda döyüşlərdə də öndə gedib. Bir çox döyüşlərdə - Füzulidə, Hadrutun alınmasında qəhrəmanlıq göstərib. Minamyot atıcısı olub. Döyüş dostlarının dediyinə görə, dəfələrlə erməni raketləri önlərinə düşüb, amma qismət elə gətirib ki, partlamayıb. Mənsur Ağayev döyüşlərdə çox qəhrəmanlıq göstərib, döyüş dostları ilə məqsədləri Şuşa uğrunda baş qoymaq olub. Elə Şuşa uğrunda gedən döyüşlərdə də, qəhrəmanlıq göstərən Mənsur Ağayev noyabrın 9-da, Şuşada şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən, Mənsur Ağayev ölümündən sonra "Vətən uğrunda" medalı ilə təltif edilib.
Azərbaycanın Xocavənd rayonunun işğaldan azad edilməsi uğrunda aparılan döyüş əməliyyatlarına qatılaraq, şəxsi igidlik və şücaət nümayiş etdirdiyinə görə, Azərbaycan Prezidenti İlham Əliyevin 25.12.2020-ci il tarixli Sərəncamına əsasən, Mənsur Ağayev ölümündən sonra "Xocavəndin azad olunmasına görə" medalı ilə təltif edilib.

свернуть