Алдағы уақытта мемлекеттік органдардың жұмысының тиімділігі олардың бұқаралық ақпарат құралдарымен қарым-қатынас орнатуына қарай да бағаланады. Бұл туралы бүгін Алматыда өткен IX Media Құрылтай кезінде еліміздің Ақпарат және коммуникациялар министрі мәлімдеді.

Осымен тоғызыншы рет өткен медиа жиында тағы қандай мәселелер талқыланды? Толығырақ тілшіміз Ұлан Нарынбектің материалында.

Дәстүрге айналған Медиа Құрылтай еліміздің түпкір-түпкірінен келген журналистердің басын қосты. Панельдік мәжіліс Үкіметтің ақпараттық саясаты мен БАҚ туралы жаңа заңның жобасына арналды.

Ольга Диденко, Интерньюс-Қазақстан заңгері

-Министрлік аталған заң жобасының ашық әрі жариялы талқылануына барлық жағдайды жасауда. Заң жобасының авторы мемлекеттік органдардың баспасөз-қызметі мен баспасөз-хатшыларының жұмыс істеу ережесін бекітіп беруді жоспарлап отыр. Бұл тың ұсыныс.

Сала басшысы мемлекеттік органдардың томаға тұйық отыратын кездері келмеске кететінін айтты. Енді олардың жұмысы БАҚ-пен арадағы байланысына қарай да бағаланады. Құрылтайда заң жобасының кемшін тұстары да сөз болды. Министр құжаттың сапалы шығуы үшін медианарық өкілдерін белсенді араласуға шақырды.

Дәурен Абаев, ҚР Ақпарат және коммуникациялар министрі

-Бүгін заң туралы қызу талқылау болды. Оның алдында біз жұмыс тобында кездестік. 60 адамға дейін қатысты. Қызу талқылау жүріп жатыр. Журналистік қауымға, елге өзінің бір жақсы әсерін береді деп ойлаймын.

Дағдарыс жағдайында БАҚ қалай табыс табады? Форумның екінші бөлімі осы тақырыпқа арналды. Бұқаралық ақпарат құралдары туралы жаңа заң жобасы кешкі уақыттағы жарнаманың санын азайтуды көздейді. Есесіне сыра мен шарап шығаратын брендтердің жарнамасына рұқсат берілуі мүмкін. Бұл биыл 10 пайызға кеміген жарнама нарығына қан жүгіртеді деген болжам бар.

Авторлары: Ұлан Нарынбек, Нұрдәулет Жақсыбаев

свернуть