ԱՐՑԱԽԻ ՀԵՌՈՒՍՏԱՏԵՍՈՒԹՅՈՒՆ
Օրերս Թալիշը տոնում էր իր ազատագրման 17-րդ տարեդարձը: Մարտակերտի շրջանի այս գյուղը ոչ միայն սահմանամերձ, այլև սահմանապահ է: Իր փառավոր, հերոսական ու միաժամանակ տխուր ճակատագրով Թալիշը շուրջ երկու տարի գերության մեջ է եղել: Երբ 94-ի այս օրերին հայ զինվորին հաջողվեց ազատագրել հայրենի եզերքը, թալիշցիները սկսել են համախմբվել ու վերադառնալ` ավերված ու հրկիզված գյուղը վերականգնելու եւ կիսատ թողած արդար աշխատանքը շարունակելու համար:
Այսօր, 17 տարի անց, թալիշցիների ձեռքբերումները քիչ չեն: Բարերարների ու պետության օժանդակությամբ ու աջակցությամբ Թալիշը դարձել է հանրապետության ապահով համայնքներից մեկը:
Գյուղի ազատագրման օրվա առթիվ Թալիշն ապրիլի 16-ին հյուրաշատ էր: Այստեղ էին Մարտակերտի շրջվարչակազմի ղեկավար կազմը, գյուղի ազատագրման գործում մեծ ավանդ ունեցած մարտիկները, ″Երկրապահ″-ի ներկայացուցիչները:
