TIRANË - Në një ceremoni të veçantë për 102-vjetorin e formimit të policisë në Shqipëri, Drejtori i Përgjithshëm, Artan Didi ka prezantuar edhe moton e re të policisë.

“Së bashku për një mjedis të sigurt dhe jetë cilësore në komunitet”, është motoja e re e policisë bëri me dije Didi teksa u shpreh se, “Ju garantoj së Policia e Shtetit do punojë me ndershmëri, do plotësojë Kushtetutën dhe ligjin, do përmbushë detyrat e ngarkuara në bashkëpunim me komunitetin. I njohim sfidat që kemi, për të luftuar krimin e organizuar dhe korrupsionin dhe jemi të bindur se do t’i realizojmë me sukses. Policia e shtetit do të zbatojë me përgjegjësi detyrat.”

Drejtori i Përgjithshëm i Policisë, Artan Didi premtoi punë të përbashkët të të gjitha forcave për një mjedis të sigurt dhe jetë cilësore në komunitet, teksa shprehu mirënjohje për ata që kanë humbur jetën në krye të detyrës.

Kreu i policisë theksoi se në të 12 qarqet e vendit po zhvillohen ceremoni paralele me këtë rast. “Ne do të punojmë me përkushtim për t’ju shërbyer qytetarëve, për punonjësit e policisë do ketë trajtim të barabartë dhe kualifikime, do zbatojmë standardet e komunikimit, llogaridhënie me punonjësit dhe qytetarët”, tha Didi.

свернуть