12 сәуірден бастап елімізде бензин мен дизель отынының бағасы қымбаттайды. Энергетика министрінің міндетін атқарушы Болат Ақшолақов ішкі нарықтағы жанармайдың тапшылығын тудырмас үшін осындай қадамға барып отырғанын айтады. Қазақстан мен көршілес елдерде айтарлықтай баға айырмашылығы болғандықтан, жанар-жағармай сыртқа тоқтаусыз шығарылып жатыр. Ал, енгізілген шектеулер ешқандай нәтиже бермей отыр дейді Болат Ақшолақов. Бұлай жалғаса беретін болса көлеңкелі нарық нығайып, ұлттық экономикаға кері әсерін тигізеді дейді.
Ел билігі кей өңірде дизель тапшылығы барын айтады және жанар-жағармайдың бағасын көтеруге мәжбүрміз дейді. Өйткені, дизельге сұраныс тұрақты түрде өсіп келеді. Мәселен, былтырдың өзінде Қазақстан арқылы өтіп жүрген шетелдік көліктер 150 мың тонна дизель тұтынған. Ал, алыпсатарлардың экспортпен жөнелткені 200 мың тонна екен. Одан бөлек, елдегі дизель тапшылығының басты себебінің бірі - көрші елдермен салыстырғандағы баға айырмашылығы. Өйткені Қазақстанда жанар-жағармай құны әлдеқайда арзан дейді Болат Ақшолақов.
БОЛАТ АҚШОЛАҚОВ, ҚР Энергетика министрінің міндетін атқарушы:
– Қазақстан - әлемдегі жанармайы арзан он елдің қатарында. Мысалы үшін, Ресейде дизель бағасы орташа есеппен литріне 345 теңге, біздегі нарық бағасынан 45%-ға қымбат. Қырғызстандағы баға 64%-ға жоғары, яғни литріне 390 теңге, Өзбекстандағы баға бізбен салыстырғанда екі есеге қымбат - литріне 480 теңге, бағамыздағы айырмашылық - 101 пайыз.
Болат Ақшолақов жанар-жағармайдың бағасын көтеру қиын шешім, десе де бұдан өзге жол жоқ деп отыр. Сонымен, бөлшек саудадағы АИ-92 және АИ-93 маркалы бензиннің бағасы 182-187 теңгеден 205 теңгеге өседі. Яғни, 11 пайыз. Ал, дизель отынының бағасы бірден 20 пайызға қымбаттап, 295 теңге болады. Дизельдің қазіргі бағасы өңірлерге байланысты 230-дан 260 теңгеге дейін екен. Ал министрдің міндетін атқарушы Болат Ақшолақов өткен жылы Қазақстан дизель отынын 5,2 миллион тонна шығарса да, тапшылыққа тап болдық дейді.
БОЛАТ АҚШОЛАҚОВ, ҚР Энергетика министрінің міндетін атқарушы:
– Қазіргі жағдайда еліміздің бірқатар өңірлерінде дизель тапшылығы бар. 350 мың тонна көлеміндегі дефицитті қымбат бағадағы импорттық отынмен жабуға мәжбүр болдық. Осы орайда, экономикаға маңызды өнеркәсіп секторы болып саналатын тау-кен метталлургия кешені және темір жол салаларының тұтыну көлемі сол қалпында қалды, яғни өскен жоқ.
Болат Ақшолақов көктемгі егіс жұмыстарының қызатын тұсында жанар-жағармайдың бағасын өсіру диқандардың жұмысына кері әсер етпейді деп отыр. Өйткені, биыл шаруаларға арнап 413 мың тонна дизель бөлінген және бағасы өзгермейді. Литрі 184-185 теңгеден сатылады. Айта кетейік, жанармай бағасын өсіру туралы тиісті бұйрық бүгін жарияланып, 12 сәуірден бастап күшіне енеді.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
